Mizoram News

Tlawmngai pawlten lungawilohna lantir an tum kaltlangpui tum

Election Commission of India in Tripura relief camp-a Tuikuk awmte April ni 9-a Lok Sabha inthlanpui lo awm tura vote thlak tir leh a tum duhloh entirna’na pawl hrang hrangte’n vawiina Aizawl-a kawngzawh huaihawt an tum chu kaltlangpui an tum.

CYMA, MUP, MHIP, MZP leh MSU te chuan Inrinni khan Aizawl Press Club-ah chanchinbumite an kawmnaah he thu hi sawiin Millennium Centre leh Khatla chuanchunga Election Office inkarah kawng hi zawh tum a nih thu an tarlang a. Election Department office kawtah hian Election Commission thutlukna an duh lohzia entirna’n Mizoram Electoral Roll a Tuikuk vote neite hming chuanna copy leh ECI in Tripura relief camp-a vote thlaktir tura a tihna order a siam lehkha copy an hal dawn tih an sawi a. Mizoram electoral roll a an awm rengna tur chhan an hriat loh thu an sawi a ni.

Pawl hrang hrang hruaitute chuan kum 1997-a anmahni duh thu ngeia Mizoram chhuahsan a, Tripura a tlan thla Tuikuk te chu vawi tam tak koh let tuma hma lak a lo ni tawh thin niin an sawi a. Mahse, tun thlengin lo kir duh lovin, chhawmdawl an ngaihna ah Sawrkar leh Kohhran ten duat taka an enkawl laia phailam media leh central sorkarah uchuak taka Mizote an hek ṭhinna leh mawi lo taka Mizo te chhuah an ni fo chu na an tih tawh thu Joint NGO hrang hrang hruaitute chuan an sawi a ni.

Thawhṭanni a Joint NGO ten kawng an zawh tur hi chawhma dar 11-ah ṭanin pawl hrang hrang aiawh ten thu an sawi ang a, he kawngzawh hi muanawm tak hnuaia zawh tum a nih thu an sawi a. Kawngzawh tawpna hmunah hian Joint Resolution siam a ni ang a, resolution copy hi zau taka sem darh tum a ni bawk.

Central YMA President Pu Lalbiakzuala chuan Mizoram Political Party zawng zawngte hnenah ngenna siamin Tuikuk anmahni duh thu ngeia Mizoram chhuahsan tute Tripura Relief Camp-a awm mek te hnenah Mizoram Political party zawng zawngte campaign a tumah kal lo turin a ngen a, kal lui an awm a nih chuan an chungthu chu tlawmngai pawl te’n an ngaihtuah tur thu a sawi a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram