Nikum November ni 23-a Tuikuk misual rual leh Tripura hel pawl National Liberation Front of Tripura (NLFT) hel ṭangrualin Mizo 2 nena an rukbova Bangladesh ramngaw-a an hren zui tak Deep Mondal chu a rubotute’n an rawn chhuah ta.
Mondal hruai chhuaktu Mizoram Police Special Branch officer-te sawi danin Inrinni tlai dar 5:40 vel khan Bangladesh ram chhungah NLFT mite’n Mizo Police officer-te kutah hian an hlan a. Inrinni zan dar 11 vel khan Mizoram ramri-a Rajiv Nagar khaw bula BSF camp rawn thlenpui a ni a. Tlaivara rawn kalpui zel a nih hnu ah nmin zing khan West Phaileng-ah lutin hetah hian doctor-te’n a hriselna te an endik a, hun engemawchen an chawl hahdam a. Chawhnu dar 3:30 vel khan Aizawl rawn thlenpui a ni a. Vawiin chawhnu lamah Air India thlawhna-in Kolkata lam a pan ang.
Aizawl an thlenpui hnu-a chanchinbumite’n an kawmnaah Mondal chuan a chhuah theihna’n tlanna sum pek a awm leh awm loh a hriat loh thu a sawi a. Bangladesh ngaw hnuaia an hren chhung hian ni 7 emaw ni 8 emaw danah an insawn pui ṭhin niin a sawi a, darkar 5 vel te ke-in an kal ṭhin niin a sawi. An man tirh lama vawi hnih kut an thlakbak chu kut an thlaklo niin a sawi a.
A thawhna company-a thla 8 chauh la thawk Mondal hian India hmar chhaka kal a duh tawh loh thu a sawi a. Rubotute’n an hrenna hmunah an ei chhe lemlo niin a sawi a. A endiktu doctor-te pawhin a hriselna a ṭhat thu an sawi ve bawk a ni.
Kum 25 a upa Deep Mondal hi Noida khawpui-a hmunpui nei Telecom Network Solution hnuaia surveyor hna thawk a ni a, Airtel company mobile tower siamna tur hmun endika khawthlang lama a kal chu taxi hman khalhtu Sanglianthanga leh 207 truck driver Lalzawmliana te nen Mamit district-a Dampa Tiger Reserve chhunga Chikha Anti-Poaching camp hlui hmun aṭangin rukbo an ni a.
Bangladesh ramhnuai-a hren an nih hnu-ah Mizo 2-te chu January ni 21 khan anmahni rubotute hian an rawn chhuah a. Tlan chhuahna sum engemaw tal pek beiseina avangin a rubotute hian Mondal hi chu an hreng zui ta zel a ni.
Hetihlai hian NLFT leh Tuikuk misualte’n vawi engemawzat mi an rukbona hmun Dampa Tiger Reserve-a Chikha Anti-Poaching Camp-ah hian tun hnai aṭang khan Police silai keng dahin Outpost siam a ni tawh a ni