Ukraine leh Russian thuneihna huam china awm Crimean Peninsula a Mizo zirlai te him dama an awm theih nana hma la tura Chief Minister Pu Lal Thanhawla’n sawrkar laipui a ngenna chu chhangin Ukraine a Indian Embassy-a Indian Ambassador Rajeev Chandra chuan Mizo zirlaite chu an him thu leh ngaihtuahawm an nih loh thu a rawn hriattir a, he thil thlengah hian chiaina tur a awm loh thu a sawi bawk.
Ambassador hian India hmarchhak (NE) mi zirlai pahnih pawh a biak thu leh an ni pawhin ngaihtuahawma an awm loh thu an hrilh tih a rawn thlen bawk a ni.
Chief Mniister hian niminpiah khan Union Minister for External Affairs Salman Khurshid leh Union Minister for Overseas Indian Affairs Vayalal Ravi te chu lehkha thawnin, zirlaite mai nilo, an chhungte mangan thu leh an thlabarzia te hrilhin Mizo zirlai naupangte ngaihsak reng tura helaia Indian Missions awmte hrilh a, ṭanpui ngaite ṭanpui zel tura hrilh hre turin a ngen a ni.