2013-14 chhungin nû, nau chunga thi mi 16 awm

Kum 2013-14 sawrkar kum chhung khan Mizoramah nausen kum khat hnuailam thi 738 an awm a, Nû, nau chunga thi 16 an awm bawk.

Hemi chungchang hi nimin khan National Health Mission (NHM)  hnuaia Reproductive and Child Health Programme buatsaihin Mizoram Journalist Association te nena Nausen kum khat hnuailam thihna Infant Mortality Rate leh Nu, nau chunga thihna Maternal Mortality Ratio chungchang zirhona ah tarlan ani a, hetah hian Reproductive and Child Health Programee-a SPO Dr. R. Lalthanga paper buatsaih chu zirho a ni a, thuthar thehdarhtute nena mipui hrilhhre tura hmalakdan tur sawihona neih ani bawk.

Zirhona aṭanga a lan danin sawrkar kum kalta April 2013 atanga May 2014 chhung khan Mizoramah dama naupiang recordzat chu 21188 a ni a, heta tang hian nausen kum 1 hnuailam thi chu 738 an awm a, IMR san zawng chu za a 34. 8 a ni. Mihring awmzat atanga chhuta nausen thi tamna ber chu Saiha District a ni a, nausen thi tlemna ber chu Aizawl District a ni.

Dr. R. Lalthanga chuan Reproductive and Child Health (RCH) Programme chu mihring inthlahpunna kawnga hriselna, a bikin nu leh naute hriselna lama hmalakna a ni tih a sawi a, kum2017-a IMR rate za a 25 a tihhniam leh MMR za a 100 nih tura tanlak chu RCH thil tum langsar zinga mi a ni a, naupang thihna leh nu, nau chunga thihna thleng thin tihtlem chu Health Deptt. mawhphurhna nimahse mipuite nen lungrual taka thawhhhova, tanlak tlan a ngai a, mipuite pawhin kan hriselna dinhmun kan enfiah a, a hun taka doctor rawn nachang kan hriat a pawimawh a ni, a ti.

He sawihona ah hi Principal director leh NHM Project Director ni bawk Pi K Ropari’n a kaihruai a, hmun kilkhawra cheng Nu naupai leh a bikin nausen kum 1 hnuailam thihna chhan ber chu nau pai laia ei leh in tha tawk lo te, damdawi in pan loh vang te, mithiam a huna rawn loh vangte leh mithiam te rawn lova mahni hmelhriat te rawn a in enkawl mai avanga tam tak chu vanduai an nih thu sawi lan ni a, heng mite hrilhhre tur hian kawng hrang hranga hmalak chhunzawm tum a nih thu doctor te chuan an sawi a ni.