Mizoram News

Selam chungchangah Police-in thuchhuah an siam

Mizoram Police Department chuan nimin khan Selam-a thil thleng chungchangah thuchhuah siamin, Official-te hnathawk tihbuai vanga dan kenkawh a ṭul a nih chuan, loh theihlohvin a ṭul angin hma an la zel dawn tih an sawi.

Forest Department hnathawkte Selam khua mi ṭhenkhatten hriamhrei nena um a, sawisak leh an motor hal chung changah Forest hotuten Police-ah FIR an thehluh bawhzuiin thubuai an ziaklut tih an sawi a, he thil thleng hi dan ang thlapa Sawrkar hnathawkten an hna an kenkawhna a hriamhrei leh tharum hmanga beihletna a ni a, dan kalh tlat leh ngaihzam chi a ni lo an ti.

Sawrkar hnathawk ten an hna thawk thei lova tharum leh hriamhrei nena beih chu thil thleng fo lo, thil pawi danglam bik a ni tih an sawi a. Chuvangin dan kengkawhtu Police te chuan Selama thil thleng hi a la thutakin pawisawitute chu dan anga hrem ngei turin hma a la a ni, an ti a, Forest Department hnathawktute chunga Selam khaw mipuite chet duh dan enin, engkim thleng thei leh hmachhawn thei turin Police mi leh sate hi tirh an ni, an ti bawk.

Hetihlaia Dan leh thupek kengkawhtu Police te pawh dan lek kawh thei lova dan beh an ni te, Sawrkar hnathawk  beihnaa mawhphurtu mi 14 an man hnua an kir lehna tur kalkawnga nunau leh hmeichhia te hmatheha kawngpui a muttir te, kawngpui dangchat tur a thing lian pui pui kih thluk leh thingtum dahte chu dan bawhchhiatna a ni a, he thil thlengah hian Police te hian dan ang thlapin hna an thawk a ni tih an thuchhuahah chuan an sawi a ni.

Police hmachhawn tura lo awmte chu naupang leh hmeichhia pawh nise ‘Mob’ tih in a huam tel vek avangin, Police ten Mob an hnawhkianna lamah kut an lo tuar ve thei a, naupang leh hmeichhia chak lo zawkte hmatawng a dah a, hnawh darh an lo nih a, hliam hial an lo tawrh pawhin a mawhphurtu chu Police ni lovin hmatawng a dahtu leh an hruaitute an ni zawk an ti bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram