2014-15 chhungin MGNREGS hnuaiah ni 15 inhlawhna siam

Kumin kum kal mek, 2014–2015 chhungin Serchhip District chhungah MGNREGS hnuaiah ni 15 chhung inhlawhna siam a ni tawh.He thu hi nimina Serchhip DC’s Meeting Room-a Serchhip District Level Vigilance and Monitoring  Committee ṭhutkhawmnaah sawilan a ni a, he Meeting hi Committee Chairman Pu CL Ruala, Lok Sabha MP, Co- Chairman Pu Ronald Sapa Tlau, Rajya Sabha MP leh Er. Lalrinawma MLA (Tuikum Constituency) ten he hun hi an hmanpui a, Committee Chairman-in a sawmna angin Co-Chairman Pu Ronald Sapa Tlau chuan he meeting hi kaihruaiin, Sawrkar laipuiin District chhung hmasawnna hna a ruahman chi hrang hrangte kalpuitu Implementing Department ten an thawh dan an thlirho a ni.

Meeting kaihruaitu Pu Ronald Sapa chuan member te chu hmasawnna hna thawh chungchangah Serchhip District tana hma latu bulpui ber, a hnuk an nih thu hrilhin hmasawnna tak tak duhna thinlung pua hna thawk tur leh Statistic leh Data te pawh dik tak leh innghahna tlaka siam ṭhin turin a chah a, Mizorama Grape thar te a thur tlat ṭhin zirchianga Grape thlum kan thar chhuah theih dan tur min ngaihtuah sak leh Pa (mushroom) chi rin tlak kan chin theih nan Taiwan Sawrkar a dawr thu leh mithiam an rawn tirh thuai dawn thu a sawi bawk.

Lok Sabha MP Pu CL Ruala pawhin Mizoram sangha tharchhuah chungchang sawiin phai dilah Sangha ṭha tak tak Mizoram pâwn ami ang quality an thar chhuah theih lai a, a Zo deuha sangha dil awmte thar chhuah a tlêm bakah a quality a hniam deuh bik ṭhin chu zirchian ṭula a hriat thu a sawi a, IWMP hnuaia Project te chu an hmalakna huamchhung (area) a zau hlawm ṭhin em avangin vil hneh a har ṭhin a, hlawhtlinna hmuh loha tham ral mai mai a awm loh nan Project awm sa te a hlawhtlin hma chu nasa taka insawrbing ṭhin turin PIA te a chah a ni.

Meetingah hian DRDA kaltlanga hnathawh zing ami MGNREGS hnuaia hna 591 (Serchhip RD Block – 413, E.Lungdar RD Block – 178) thawh niin heng zinga 560 (Serchhip RD Block – 392, E.Lungdar RD Block – 168) hi thawh zawh tawh a ni a, thawh lai mek 31 (Serchhip RD Block – 21, E.Lungdar RD Block – 10)a awm bawk. Kum 2014-2015 chhung atan Serchhip RD Block huam chhungah tun thlengin Job Card 11305 pek chhuah a ni a, E.Lungdar RD Block huam chhungah Job Card 3442 pek chhuah a ni bawk. Sawrkar laipuiin MGNREGS hnuaia hna siam zinga 60% tal Agriculture leh a kaihhnawih thila hman tur a tih chu tihhlawhtlin a ni tih sawilan a ni.

Kum 2001 leh 2011 inkara Mizoram chhunga Child Sex Ratio chhinchhiahnaah Mizoram pumpui a nausen hmeichhe piang zat chu nausen mipa1000 zela 6 (2001-ah 964, 2011-ah 970) a a pun laiin Serchhip District bikah erawh 25 (2001-ah 974, 2011 ah 949)-in a tlahniam thung a, hei hi Lok Sabha leh Rajya Sabha MP te chuan an vei thu uar taka sawiin chhuichian vat a ngai a ni an ti a, Health Department hotute pawhin a chhan zirchiang a hma an lak vat an beisei thu an sawilang bawk.

IAY hnuaiah kum 2014-2015 chhungin Serchhip District ah In 57 sak phalsak a ni a, Sawrkar laipui aṭangin In 26 sak na tur pawisa hmuh a ni tawh a, Serchhip RD Block ah In 17 leh E.Lungdar R.D Block ah In 9 sak a ni dawn a, a dawngtu tur pawh thlanfel vek tawh an ni.

Integrated Watershed Management Programme (IWMP) hnuaiah Project 5 awmin heng atan hian Annual Action Plan siam mek a nih thu Project Implementing Agency (PIA) ten an sawi.

National Social Assistance Programme hnuaiah  Tar Pension (IGNOAPS) dawngtu mi 1554 (Serchhip RD Block – 898, E.Lungdar RD Block – 656) an awm mek a, Pension hi Bank kaltlanga pek vek an ni.

Hmeithai Pension (IGNWPS) dawngtu mi 141 (Serchhip RD Block – 72, E.Lungdar RD Block – 69)  an awm mek bawk a, Rualbanlo ṭanpuina (IGNDPS) dawng mi 39 (Serchhip RD Block – 20, E.Lungdar RD Block –19) an awm mek bawk.

National Rural Drinking Water Programme (NRDWP) hnuaiah PHE, Serchhip Watsan Division-in Chhingchhip, Baktawng, Seling, North Mualcheng, Buangpui, Tlangmawi leh Sailulak khua te tan tuilakna an siam zawh sak thu an tarlang a, Swachh Bharat Mission hnuaiah khawfai lawmman dawng turin khaw 4 tan dilna an siamsak thu tarlan a ni bawk.

EE, PWD, Serchhip Division huamchhungah PMGSY Road 5 (Serchhip RD Block – 4, E.Lungdar RD Block – 1) siam mek a ni a, chungte chu Serchhip Block ah: Chhingchhip – Hmuntha Road (24.400 Km), Chhingchhip – Thentlang Road (12.800 Km), Hmuntha – Khawbel Road (19.950 Km), Chhingchhip – Hualtu Road (20.250 Km) a ni a, E.Lungdar Block ah : E.Lungdar – Sailulak Road (18.580 Km) te an ni a, heng kawng te hi January ni 18, 2014 aṭanga thawh ṭan niin thla 24 chhunga thawh zawh tur a ni a, PWD te enkawlna hnuaiah Contractor ten theihtawp chhuahin hna an thawk mek a ni.

EE, PWD, Khawzawl Division huamchhunga PMGSY road siam mek 4 (Lungpho – Thinglian, Chhawrtui – Vanchengpui, Rullam – Lungpho, Lungpho – Hmunzawl) zingah Lungpho – Thinglian chu formation cutting zawhfel tawh a ni a, a dang pawh chak taka hna thawh mek a nih thu tarlan a ni bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram