CEC tharah HS Brahma

Election Commissioner, Pu Hari Shankar Brahma chu Chief Election Commissioner thar a ni dawn a, he hna chelh mektu, Pu VS Sampath chu a hun hmang zo-in niminpiah khan a chawl ta a ni.  Pu HS Brahma hi Election Commissioner ni lai zinga a  senior zawk a nih avangin, Law Ministry rawtna angin CEC atan ruat a ni.

Assam mi, CEC thar, HS Brahma hi 1975-batch IAS officer, Andhra Pradesh cadre a ni a, kum 64 mi a ni. Kum 65 a nih thleng chauh, he hna hi a chelh theih dawn avangin thla 3 chhung, April ni 19 thleng chauh CEC hna hi a chelh thei dawn a, a hmaa CEC, Pu VS Sampath kha chuan kum 6 deuhthaw he hna hi a thawk a, President leh Vice-President thlanna bakah Lok Sabha inthlan pawh vawi 2 a buatsaih a, state zawng zawng Assembly inthlan a buatsaih kim vek hman bawk a ni.

Brahma hian kum 2010 August ni 25 khan Election Commissioner hna a thawk ṭan a, hemi hma hian sawrkar laipuiah Power Secretary a ni. Meghalaya mi, Pu JM Lyngdoh tih lohvah chuan Brahma hi hmar chhak bial mi, CEC hna chelh hmasa ber a ni dawn ta a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram