Pu K.Rosiama (64), Chhiahtlang Hmar Veng, Chhiahtlang VC Member chu nimin khan thing aṭangin a tla a, Serchhip damdawi in panpui a nih hnu-ah a hliam tuar lovin a boral.Thulakna tarlan danin Pu K.Rosiama hian nimin zing khan an kawmthlangah panhnah lo-a Khuangthli kunga a lawnna aṭangin a tla a, a tlakna hi feet 30 vela sang a ni a, a tlakna hmun hi a awih avangin a tlak hnu hian meter 20 vel a thui a lum leh a, hemi hnu hian Pu K. Rosiama hi Serchhip damdawi in panpui nghal niin, nimin zing lam dar 8:30 vel khan damdawiin thlenpui a ni a, chhun dar 12:30 vel khan a hliam tuar lovin a boral ta a ni.
Pu K.Rosiama hian a tlaknaah hian a hnungzang ruh a sawh chhiat bakah a kaw-chhung pawh na takin a sawh chhe tel niin thulakna chuan a sawi.
Pu K.Rosiama hi VC inthlan hnuhnung berah khan ZNP Ticket-in Chhiahtlang VC Member atana thlantlin a ni a, nizan khan a ruang hi lumenpui a nih hnu-ah vawiin hian vui liam a ni ang.