Zothlifim Logo
Loading ...

Direct Benefit Transfer for LPG (DBTL) Scheme hnuaiah chhungtin in Gas connection pakhat aia tam an nei thei a. Amaherawhchu chhungkaw pakhatin subsidy connection chu pakhat bak an nei thei lo tih Supply minister Pu John Rotluangliana’n a sawi a,  Subsidy kher lo atan phei chuan connection duh zat zat a neih theih a ni, a ti.Nimina Congress Bhavan political sessionah thu sawiin Supply Minister chuan gas connection neih tam tuma Ration card ṭhendarh chuan awmzia a nei lova, chuvangin DCSO zawng zawng hnenah Gas connection avanga ration card ṭhendarh chu ti tawh lo tura hriattir an ni, a ti.

Minister chuan, sawrkarin buhfai chhekkhawl sa, FCI Kudam-a awm tiam lovin, quintal 1,70,000 chuang a a neih thu sawiin, mamawh aia tam pawh a awm theih a rin thu a sawi a, a chuang bang a awm theih chuan thingtlanga kg 8 a sem ṭhin chu kg 10 ah tihpun a ni ang a ti.

NGO leh Kohhrante’n sawrkar ngenna an ngaih pawimawh chhoh zela special permit an dil tawh lo tih sawiin hei vang hian mipui quota tihpun theih thuai an beisei tih a sawi a, Pu Rotluangliana chuan mipui hnena ration buhfai lakchhuah nana kg 1 Rs.5.50 a tih to in mirethei zawk te a nghawng lova, BPL leh AAY te chuan a man tlawma an lak ṭhin ang tho khan an la mek a ti a, hemi atan hian central sawrkarin thlatin quintal 52,200 a rawn pe ziah niin a sawi bawk.

Local supplier hnen aṭanga buhfai a tlawm zawk a lei a nih tak avang leh mipui lamin Kg 1 zelah Rs.5.50 an tum ve tak avangin sawrkarin kumtin cheng vbc 91.776 a hum thei tih sawiin, sawrkar officer liante’n ration card hman loh an remtih chuan nasa takin sum senso a titlem dawn a ni a ti.

Tun dinhmunah hian Mizoram sawrkarin thlatin buhfai quintal 80,000 a lei a, FCI atangin kg 1 khat Rs.29.81 in a lei, mipuiin a man an tum ṭhen ve tak atang hian sawrkarin kg 1 zela a chawi belh chu Rs.16.25 aṭangin Rs.10.75 ah a tlahniam ta a ni a ti.