Kolasib CJM Office-a Excise & Narcotics Br. Office rawk

Chief Judicial Magistrate, Kolasib Office chhunga, Mizoram Excise & Narcotics Branch Office chu Nilaini zan khan misual tu tih hriatloh ten an rawk.Thulaknain a tarlan danin, misual te hian District Court chhak lama motor dahna hnuaia tukverh leh tukverh bar kar chhia-in an lut nia hriat a ni a, Office chhunga Steel Almirah chu an karchhia a, a chhunga pawisa dah enge-mawzat chu an ruchhuak a, pawisa an lak zat chiah hi hriat theih a la ni lo.

Almirah-a zu an dah pawh an khawih nual a, a ṭhen chu chhuatlai-ah te an leihbaw bawk.

Hei bakah hian Rolling Chair leh ṭhutthleng phah te pawh Office chhungah hian an hâl a ni.

Hetihrual hian Police lam chuan pawi khawihtu zawn hna hi ngawrh takin an thawk mek a ni.

Thulakna chuan tunhma deuh pawhin District Court chhungah hian mi an lo lut ru fo tawh ṭhin niin a tarlang.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram