Mizoram Larsap thar atana ruat Dr. Aziz Qureshi chu nimin tlai dar 4 khan Raj Bhawan-ah rinawmna thu tiam tira Mizoram Governor 15-na atan lakluh a ni.
Governor lakluhna inkhawm ah hian Chief Secretary Pu Lalmalsawma, IAS chuan President Dr. Pranab Mukherjee’n, Dr. Aziz Qureshi, Mizoram Governor atana a rawn ruatna lehkha Warrant of Appointment a chhiarchhuah hnuin Gauhati High Court Judge thar Justice Michael Zothankhuma’n rinawmna thu tiam tirin Dr. Aziz Qureshi hi Mizoram Governor atan lakluh a ni.
Larsap thar lakluhna inkhawm-ah hian Chief Minister Pu Lal Thanhawla, Assembly Speaker Pu Hiphei, Minister-te, Parliamentary Secretary-te leh MLA te bakah Sorkar mi pawimawh thahnem tak an tel.
Larsap thar hi kum 74 a upa niin February ni 3, 1940 khan Bhopal-ah a piang a. Government Hamidia College, Bhopal; Agra University; Vikram University, Ujjain; leh Bhopal University atangtea zirchhuakin MA (Political Science), MA (Arabic), MA (Urdu Literature), LL.B., Ph. D (Political Science) leh D.Lit. (Honoris Causa, Aligarh Muslim University-in a hlan) degree te nei a ni.
Kum 1972 leh 1977 inkar khan MLA niin hemi chhung hian Madhya Pradesh Sawrkar-ah Minister niin Power & Irrigation Minister leh Education & Endowments Minister te a ni a. Kum 1988 khan Satna bial atangin MP atan thlan tlin a ni bawk. May ni 15, 2012 leh December ni 30, 2014 inkar khan Uttarakhand Governor niin June ni 22 2014 leh July ni 22, 2014 inkar khan Uttar Pradesh Governor hna a hmui bawk a ni.
Zirna lam abik takin Urdu tawng zirna lamah sulsutu niin Founder Vice Chairman of National Council for Promotion of Urdu Language nihna leh Central Urdu University dinna atana Sawrkar Laipuiin a din Urdu University Committee-a Chairman nihna te a chelh tawh bawk a ni.
Tunhnaia Mizoram chuan Governor a nei zing mawlh mawlh hle a. Kum 2011 August ni 26-a Mizoram governor atana ruat Pu Vakkom B Purushothaman chu nikum July ni 6 khan Nagaland-ah sawn a ni a; mahse Nagaland Raj Bhavan luah duh lovin July ni 11 khan a banna a thehlut a. Gujarat governor Dr Kamla Beniwal-i chu Mizoram-ah sawn a ni leh a, ani hi July ni 9 khan thutiam tira lakluh a ni a, mahse thla khat a awm hman chiah tihin sawrkar laipui chuan a bân leh a; a aiawh turin Manipur Governor Pu Vinod Kumar Duggal chu ruatin Manipur Govenor ni chunga Mizoram hmui tura tih a ni a. Mizorama hun engemaw chen lo awm tawh Pu Duggal hi August ni 9 khan Mizoram governor ni turin lakluh a ni a, mahse a aiawh tur hian Maharashtra governor Pu Kateekal Sankaranarayan chu Mizoram larsap atan August ni 23 zanlai pelhah khan an rawn ruat leh ta a ni.
Pu Sankaranarayan hian Mizorama sawn chu duh lovin August ni 24-ah a banna a thehlut a. Pu Duggal chuan Manipur Governor ni chungin Mizoram a hmui zui a. Mahse bânna a thehluh ve leh tak avangin Meghalaya governor Dr Krishan Kant Paul chu September ni 16 khan Mizoram hmui turin lakluh leh a ni a. Thla 4 dawn mahni puala governor nei lova a awm hnu-in Mizoram chuan ama pualin Governor a nei ve leh ta a ni.