Zothlifim Logo
Loading ...

Clean Mizoram Movement Committee chu an chairman Pu Joseph Lalhimpuia, Parliamentary Secretary hovin pisaah nimin khan an ṭhukhawm a, January ni 30 a rampum huap Faina Hnatlangpui neih dan tur an ngaihtuah.Committee chuan Mizo-ramah faina hi mitinin an veia, an engto theihna turin faina hi Movement anga kalpui ṭha a ti a; chumi atana hna hmasaah Mizoram pum huap Faina hnatlangpui ni January ni 30, 2015-ah neih nise, tiin an rel a. Hemi hunah hian mahni theih dan kawng ṭheuhin mitin hnatlang turin Committee chuan a ngen a ni.

School naupangte’n anmahni school ṭheuh leh a ṭul dan a zirin YMA-te nen ṭang tlangin hnatlan nise an ti a, Vengtina YMA leh Local Council-te pawh hnatlang ṭheuh tura ngen nise, tiin, Sawrkar Office tinah mahni Office leh a vel tifaia hnatlang turin sawrkar hnathawk zawng zawng te ngen nise an ti a, Pawl hrang hrang, sumdawng pawlte, lirthei neitu leh khalhtu pawlte, chawhmeh zuar pawlte pawh hnatlang tura ngen nise an tih bakah zing karah Chief Minister hovin Electric Veng Sumo Stand-ah hnatlang neih nise an ti bawk.

He hnatlangpuiah hian hnim leh phul thlo lovin bawlhhlawh thenfai hna thawh tur a ni a, thlalak tam thei ang ber lakkhawm a, a puala Facebook Group siamah hnatlang zât leh thlalakte chu a thei apiangin tarlan nise tiin Clean Mizoram Movement Committee chuan an rel a ni.