MZP leh Mobile Phone Service Provider hotute inkâwm

Nimin khan Mizorama Private Mobile Phone Service Provider hrang hrang hotute leh MZP hruaitute chu MZP Pisa Pui-ah an inkawm khawm a, he inkawm khawmnaah hian thil chi hrang hrang sawiho a ni.Inkawmkhawmna hi Pu Lalhmachhuana, MZP President-in a kaihruai a, he hunah hian Mobile Phone Company hrang hrang: Airtel, Aircel, Vodafone, Reliance leh Idea hotute an tel a, Pu Lalhmachhuana’n meeting koh a nih chhante a sawifiah hnuin Company hrang hrang hotute leh MZP hruaituten an ngaihmawh zawngte leh Mobile Phone Company hrang hrang ten tun aia ṭha zawka an Service an kalpui dan turte sawiho a ni.

Inkawm khawmnaa sawiho hrang hrangte zingah Mobile Phone Service Provider ten mi thiam leh thawk thei an awm chuan a tam thei ang ber Mizo chhawr ṭhin rawh se tih te, Mobile Phone Service Provider ten an mi chhawr te chu agreement mumal taka nei a chhawr ṭhin turin leh chhan leh vang mumal tak awmlo a an hnuaia hnathawkte ban mai mai ṭhin lo se tih te, thawhchhuah la neilo zirlaiten ṭulloa mobile phone leh a kaihhnawih a pawisa an khawhral nasa lutuk ṭhin chu a ziaawm theih nan a theih dan apianga awareness siam nise an ti a, India ram pumah mi pakhatin thla khatah mobile phone hmanna atana Rs.70 zel an hmanral laia state rethei tak Mizoram mipuiten chawhruala mi pakhatin thla tin Rs.250 vel zel mobile phone hman man atana kan sengral ṭhin chu tihhniam a nih theih nana hmalak ho ni se tih leh Mizoram hmun hrang hrang a Mobile Phone la hman theih lohna hmunah a rang thei ang bera Mobile Phone hman a nih ve thuai theih nan Mobile Phone Service Provider ten theihtawpin hma la chhunzawm se tihte a tel a ni.

MZP chuan Assam police leh Assam Forest mi leh sa ten Mizoram chhung Buhchangphai a Mizo leilet thlam leh thlai te tihchhiata an vau leh ta chu pawi an ti tak zet tih nimina an thuchhuah siamah an tarlang a, an insawi anga Assam Police leh Assam Forest hnathawk te an lo kal leh a nih chuan an lo kal ngam tawh loh nana lo hmachhawn turin MZP chuan Mizoram sawrkar a ngen a, ramri leh a chheh velah sipai tam zawk a ngheta dah an nih theih nana hma la turin MZP chuan sawrkar a ngen nawn leh bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram