Fur a reh tak avang leh hnathawh theiha khua a awm tak avangin Mizoram PWD chuan Zoram hmun hrang hrangah kawng siam hna a chhunzawm leh ta.
PWD hotute sawi danin, tunlaia ngawrh taka hna thawh mekna te chu a tlangpuiin PMGSY kawng a ni deuh vek a, chung zingah chuan South Vanlaiphai leh Muallianpui inkar kawng, KM 13 leh a chanve-a thui, Thenzawl leh Zote South inkar kawng, KM 13-a thui, West Phaileng leh Dampa rengpui inkar kawng te, Khamrang leh Mualkhang inkar kawng, KM 7-a thui te, Tawipui South leh Mualcheng inkar kawng, KM 10-te, Thingfal leh Mamte inkar, KM 11-a thui te, Lungpho leh Hmunzawl inkar kawng KM 30-a thui te, Phullen leh Phuaibuang inkar kawng KM 49-te, Chhingchhip leh Hualtu inkar kawng, KM 20-a thui te, Chhingchhip-Thentlang leh Chhingchhip Hmuntha inkar kawng KM 24-a thui te, Hmuntha leh Khawbel inkar kawng KM 19-a thui te a tel a, hengah te hian Contractor-ten kawng black top turin ngawrh takin lung an phah mek niin an sawi. Hemi bakah hian Hliappui leh Saichal inkara NEC kawng pawh black top thuai tum a ni a, hnathawk tura thlan, Contractor chuan hna tan thuai turin tunah hian thil pawimawh a la khawm zo tep tawh a ni.
World Bank sum hmanga Champhai leh Zokhawthar inkar kawng, KM 30 vela thui pawh siam that tan tep a ni tawh a, he hna, cheng vbc. 137 senga thawk tur hian Mumbai-a hmunpui nei, TARMAT Ltd. chu thlan fel a ni tawh a, Contractor hian tunlai hian kawng laih dan tur a en fel mek niin PWD hotute chuan an sawi.
National Highway 44-A atanga penga Lengte bul atanga Buarpui tlang dung zuia Chawngte, Diltlang leh Bungtlang South-te tlawha Multi Modal Transit Transport Poject kawng pawh tura World Bank kawng thar laih tur chu en fiah mek a ni a, he kawng survey hna thawk tur hian New Delhi-a hmunpui nei, Lea Associate, South Asia-a mi thiamte chuan tunlai hian he kawng hi an survey mek bawk a ni. Bairabi-Zamuang kawng, Bairabi-Mamit kawng ni bawkin Tlawng lui a pal tlangna laia concrete lei dawh hna, chawlhsan lailawk pawh chhunzawm leh tawh a ni. PWD hotute chuan he lei dawhna tura lui laia ban phun, awn deuh nia hriat avanga chawlhsan lailawk chu Consultant ruaiin a design siam that leh a ni a, rinawm tawk tura a din dan siam that a nih hnuah lei hi dawh chhunzawm a ni leh tawh a ni. Thulakna tarlan danin, he kawnga Tlawng lei hi dawh zawh a nih hunah chuan Mamit Dist. Hqrs. leh Mamit tlang dunga khuate chuan nitin khawsakna mamawh leh thil dang in sakna hmanrua thlengin Bairabi rel station kaltlangin man tlawm zawkin an lei thei tawh dawn a ni.