HPC(D) nia hriatten Police pathum kap hlum

Inrinni zing khan Hmar People’s Convention – Democrats (HPC-D) hel pawl mi ni ngeia hriatte’n Kani tia hriat ṭhin Zokhawthiang khaw bulah Assembly Committee on Government Assurances member leh an ṭhuihruaite an lambun a, mi 3 an thi a, mi 6 dang an hliam.
Thulakna tarlan danin he inlambunna hi zing lam dar 8 pelh hnu-a thleng a ni a, thite chu Sakawrdai Police Station OC, Sub-Inspector Zoramthara Khawlhring, Driver Chuailova leh Constable Hmangaihmawia te an ni a. Hliamte chu Sakawrdai SDPO Pu Zarzoliana, Havildar Vanṭhuama, Constable Lalhmangaiha, Constable Lalkhawngaiha, Pu RL Pianmawia driver Pu Lalchhuanawma leh Assembly Secretariat-a peon Pu Zohminga te an ni a, hliamte hi helicopter hmangin Sakawrdai aṭanga phurh thlak an ni a, Aizawl Civil Hospital-ah enkawl an ni.

Thudawn danin helho hian Manipur leh Assam ramri bul Zokhawthiang luh dawnah an lo lambun a. Police ho kut aṭanga AK-47 rifle 2 leh pistol 4 an lak hnu-ah ramri kânin an tawlh kir leh a, darkar khat vel zet an inkâp nia thudawn a ni a, HPC (D) mite hi 12 vel nia hriat a ni a. An inkah hlim hian Zokhawthiang khaw mite hi an ralkhel nasa hle a, tam takin khua an tlanchhiatsan hman nia thudawn a ni.

Committee on Government Assurances memberte hi chairman Pu RL Pianmawia hovin MLA dang pahnih Pu Lalthanliana leh Pi Vanlalawmpuii Chawngthu te an ni a. Anmahni ṭawiawmtute hi Assembly Secretariat aṭangin Pu Zothansanga Under Secretary, Pu Lalrinawma Committee Officer, Pi Lalchuailovi leh Pu Zohminga te an ni a. Helai bial vela sorkarin Assembly House a a intiamna a bawhzui leh bawhzui loh a hmuna endik tura kal an nih thu dawn a ni.

Sawrkar chuan thuchhuah siamin Pu RL Pianmawia, Pu Lalthanliana leh Pi Vanlalawmpuii Chawngthu Assembly Assurances Committee member ten ram hmasawnna atana ruahmanna en tura kal HPC (D) nia hriatten an lo lambun a, anmahni vengtu Police 3 lai kaphlum a midang 5 lai an hliam chu sawrkarin a dem takzet tih a tarlang a. Ram hmasawnna tura thawktute hetianga lo lambun a lo tibuai a, nunna hial lak duhtute hi an demawm takzet a ni, a ti a. Sorkarin inbe rem tura theihtawpa hma a lak laia hetianga tharum thawh a ni hi a demawm chauh nilovin, a huatthlala takzet a ni, thuchhuah chuan a ti bawk.

Mizoram Rorelna sang ber Assembly Session hnuhnung ber ah “Zofate inpumkhatna daltu chu engmah tih ni lo rawh se” tih lungrual taka pass a nih laia hetiang tualthahna Mizoram chhung ngei a a thleng hi sorkar chuan pawi a tih thu a sawi a. Pawi khawitute hi Mizote leh Mizoram hmelmate an ni tiin sorkarin a dim dawn lo niin thuchhuah chuan a sawi a. Mitthi chhungte sorkarin a tuarpui takzet a, Pathianin thlamuan a awmpui turin a dilsak a ni, a ti a. Hliam tuarte pawh an that leh thuai a beisei thu leh, hliamte inenkawlna tur pawh sorkarin a ngaihtuah sak zel ang, a ti a. Mitthi chhungte chu zangnadawnna pangngai bakah chhawmdawlna awm thei ang ang sawrkarin a ngaihtuah dawn niin sawrkar thuchhuah chuan a tarlang a ni.

Hetihlai hian Tlawmngai pawl hrang hrang leh Political Party te pawhin thuchhuah siamin he thil thleng hi an dem thu leh pawi an tih thu sawiin, nunna chan ta te an lainat thu leh an chhungte an tawrhpui thu sawiin, Mizoram ṭhendarh zawng leh Mizo hnam inpumkhatna tichhe thei zawnga hmalakna reng reng an do tlat thu an sawi a, HPC(D) te chetna chu Hmar mipui ten an thlawp loh thu an sawi bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram