MPSC Chairman-in a hnathawh tawh atanga teh turin duh

Mizoram Public Service Commission Chairman Pu Andrew Lalherliana chuan MPSC chu Constitutional body anih anga a zahawmna vawng him a tul thu leh Politics mi a nih tawhna ni lovin a hnathawh tawhna atanga teh a duh thu a sawi.
Nimin khan Aizawla a office ah thuthar lakhawmtute kawmin Pu Andrew Lalherliana chuan mifel famkim anih bik loh thu leh MPSC-ah kher chuan theihtawp chhuaha, a thawhpuite zarah thawk tha ve a nia a inhriat thu a sawi a, a hnathawh atangin Mipuiten min teh sea duh thu a sawi a ni.

MPSC Chairman leh Member te ruat danah pawh a hunlaia Sorkarna chelhtu apiangin an ruat mai thin avangin, Political Party zawng zawng, Sorkar mek leh Sorkarna la siam lehzel turte pawhin he mawhphurhna la chang thei vek an ni tih inhriain neitu rilru nen MPSC vawn zahawm tum theuh a tha hle ang, a ti a. Politics inchirhthehna ah hmang lo hram turin a ngen bawk a ni.MPSC dintirh 1991 atan vawiin thleng hian Chairman leh Member-a ruat lo ni tawh zawng zawngte chu an hunlaia Sawrkarin mi tling leh thaa a ngaihte an ni vek a, sawi pawr a tul lemlo a ti a. MPSC member te tehna ber tur chu, an hna lak dan leh hna thawh record ni ta se la. Party mi leh mimal duhsak bik an neih leh neih lohte chiang taka lo thlirin, hemi kawngah hi chuan mipuite thikthu pawh chhia se ram tan a tha, a ti.

Pu Andrew Lalherliana chuan, MPSC Member-a a awm ve tan April ni 1 2013 atanga Feb.2015 thleng, Sorkar hna hrang hrang, Doctor, Engineer leh College Professor-te, Technical leh General Line hna hrang hrang atan Candidate 2322 an interview-in mi 573 hna pek an nih thu a sawi a. Hemi chhung hian diklo taka tih emaw, a tling lo zawk tihtlin emaw sawi tur hria tumah an awmlo, a ti a. India ram State dangte nen khaikhin pawhin Mizoram MPSC hna lak dan chu ‘Fair’ ber min ti thin a ni, a ti bawk.

Pu Andrew Lalherliana chuan a Official kum chungchang sawiin, High School atanga a kum hman chu October ni 7, 1953 a ni a. Kum 1969-a Australia-a an pem dawnin a pain Passport a siamsakah Date of Birth chu October ni 7, 1953 a ni a. Chumi chu Australia-a an School ah pawh a hmang ni a sawiin, a pian kum chungchanga thuchhuah thenkhat lo lang chu a hriatpui lova, tuna a hmanlai chu a document zawng zawng nen a inmil vek tih a sawi.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram