Kumin Academic session thar atan sawrkar chuan school syllabus leh text book a siam a, hei hi school zawng zawng, sawrkar leh private school ten an hmang tur a ni a, sawrkarin a syllabus leh textbook zir tur a duan bak hi eng school mahin mahni thu in zir tur an belh tur a ni lo tih Education department hotute chuan an sawi a. School fee leh Admission fee pawh skul tina inanga hman turin sawrkar chuan a bithliah thar bawk a. Hengte hi zawmlo sikul an awm chuan a tul anga hmalak a, skul recognition suspend emaw, hlih sak emaw thlenga ngaihtuah a ni dawn tih School Education hotute chuan an sawi a ni.
Hemi chung chang hi Inrinni khan School Education hotute chuan puangzarin MJA Press Club-ah Chanchinbumite an kawm a, Pu Lalzirmawia Chhangte, Addl. Secy, School Education, Pu K. Lalthawm-mawia, Director, School Education leh hotu dangte’n Mizorama school timing thar chungchang leh zirna kawnga hmalakna hrang hrangte an sawifiah a ni. Rawtna thar hi uluk taka Department in a zir chian hnuah tih chhuah a ni tih sawiin Sawrkar phalna neia Skul din zawng zawngte chu zawm vek tura tih an ni tih pawh an sawi a ni.
Elementary leh High School tan kum 2015-16 school academic session tan ni atan April 1 ruat a ni a. Hei hi Govt., Deficit, Ad-hoc Aided, Lump-sum school te leh Private school Mizoram sorkarin hawn phalna a pek zawng zawng ten an zawm ngei tur a ni a. Hei hi an zawm leh zawm loh hrechiang turin anmahni bialtu DEO, SDEO, DPC (SSA), BRCC (SSA) leh CRCC(SSA) te theuh chik taka vil tur leh April 2015 chhunga report Director of School Education hnenah an thehlut tur a hriattir an ni. School tan ni a ruat a tan lo hriatchhuah te chu an chungah a tul angin sorkarin hma a la dawn niin an sawi a.