Nimin chhun khan Aizawl Municipal Council (AMC) Secretary Room-ah AMC official leh Prism hruaitu ṭhenkhat ten AMC kal dan leh hmasawnna tur te an sawiho.
He hun hi AMC Secretary Pu James Lalnunmawia’n a kaihruai a, AMC hmalakna leh an thuneihna bakah Dan an neihte a sawifiah a, hmachhawp an neih leh Project an kalpui lai te a sawi fiah bawk. Heng an hnathawh mek teah hian sawt zawk leh chak zawka AMC in hna a thawh theihna atan Prism hruaitute pawhin rawtna an neih te an thlen a, AMC in an thuneihna hnuaia Dan an lekkawhna lama chak zawka hma an lak theihna tur rawtna an thlen bawk a ni.
Prism chuan AMC in chak zawka hma an lak theihnan The Mizoram Municipality Act, 2007 in thuneihna leh mawhphurhna a pek te AMC in an kenkawh a tul nia an hriat thu an sawi a, Prism chuan Aizawla inawpna leh inenkawlna ṭha a awm theihnan kum tawp lama AMC inthlan turah political party ten election manifesto tha leh candidate tha an neih a tul an ti a, hei vang hian AMC inthlan lo awm tur atan Aizawl pual Mipui Manifesto siam an tum bakah Councillor ṭha ngei an neih theihnan ‘LEPSENA’ kalpui an tum bawk a ni.