Europa League-ah Sevilla an champion

*    Sevilla chu Europa League title vawi 4 la thei hmasa ber an ni
*    Dnipro-in European final an khelh vawi khatna a ni.
Nizan hmasa khan Warsaw-a UEFA Europa League final khelhah Sevilla chuan Dnipro hneha champion-in Europa League-a champion tam ber record thar an siam.

He inkhelah hian Ukrainian Club Dnipro hian hma an hruai hma hle a, minute 7-na lekah Nikola Kalinic tauh goal hmangin Dnipro hian hma an hruai nghal a, Sevilla si phurh hi minute 28-naah Grzegorz Krychowiak chuan a sût a, minute 31-naah Carlos Bacca chuan Dnipro goalkeeper bumin Sevilla hma-hruaina goal a thun zui ve leh a, first half tawp dawn, minute 44-naah Ruslan Rotan chuan free kick aṭangin mawi em emin Dnipro tan a pet goal a, half time a nih chuan 2-2 in an inhnehtawk.

Second half inkhel hmuhnawm takah Sevilla chuan Bacca a rawn che leh a, minute 73-ah goal a thun leh a, he goal hi Sevilla chuan an champion pui ta a, 3-2 in Sevilla chuan hnehna an chang ta a ni.

Sevilla tan Europa League-a ṭum 4 an champion-na niin Europa League-a champion ngun ber an ni ta a ni.

Sevilla hi La Liga lamah 5-na an nih avangin La Liga Quota aṭangin Champions League an khel phâk lova, mahse tun season aṭangin Europa League champion chu Champions League an khelh theih tawh dawn avangin season tharah Sevilla hian Champions League an khelh theih phah dawn bawk a, La Liga aṭangin Champions League khel tur club panga an awm ta a, Sevilla hian Group stage aṭangin an khel ṭan dawn ta a ni.

Sevilla tana goal 2 thuntu, kum 28 mi, Bacca hi kum 20 mi a nih khan Bus Conductor-ah a la ṭang a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram