Mipa lamah Top Seed Novak Djokovic leh Third Seed Andy Murray te pawhin Third Round an in vaw kai a, hmeichhe lamah Ana Ivanovic chuan Fourt Round a lut tawh thung.
Djokovic hian a hnungzângah insawisel-na a nei chungin Gilles Muller laka 6-1, 6-4, 6-4-a hnehna changin Third Round hi a lut a, Djokovic hi kuminah-a match 39 a khelh tawhah match 37 a chakna a ni ta a, nikum final khan Rafa Nadal lakah a tlawm a nih kha.
Murray hian Third Round thleng tur hian 6-2, 4-6, 6-4, 6-1-in Nick Kyrgios a hneh a, Murray hian a zâwnin Clay Court match 12-ah hnehna a chang ta a ni.
Seventh Seed Ivanovic hian Fourth Round lut tur hian Donna Vekic chu Straight set, 6-0, 6-3-in awlsam takin a hneh a, Ivanovic hian kum 2008 khan he hmunah hian title alo la tawh a, mahse hemi hnu hian he hmunah hian last 16 a la thleng leh ta miah lo thung a, Fourth Round-ah hian Elena Vesnina leh ninth seed Ekaterina Makarova te inkhela a chak zawk a hmachhawn ang.
Mipa lamah hian 15-Kevin Anderson, 7-David Ferrer leh 17-David Goffin-ten Third Round an lut a, Third Round thleng zo lo langsar zingah 18-Tommy Robredo, 31-Viktor Troicki leh 16-John Isner te an tel a ni.
Nimin khan mipa Third Round khelh a ni a, Japanese Star Fifth Seed Kei Nishikori chu a hmachhawn tur Benjamin Becker a walkover avangin awlsam takin Fourth Round a lut a ni.
Hmeichhe lamah 27-Victoria Azarenka, 16-Madison Keys leh 23-Timea Bacsinszky-ten Third Round an lut ve bawk a, 29-Alize Cornet leh 19-Elina Svitolina te chuan nimin khan Fourth Round an lut bawk.