Rampuma khawlum lutuk vanga thi zat chu mi 2000 an chuang tawh a, ramchhunga thi an tamna ber Andra Pradesh leh Telengana-ah chuan khawlum vanga thi belhkhawm hi mi 1979 an ni tawh a, niminpiah ringawt pawh khan khawlum vanga thi hi mi 205 ngawt an awm tawh a ni.
Odhisha-ah chuan Special Relief Commissioner Office-in report an dawn danin mi 108 an thi tawh a, mahse heng zinga mi 17 chiah hi khawlum vanga thi tih finfiah tawh niin, mi 70 chu an thihchhan chhuichian mek a ni an ti a, Gujarat-ah pawh kawlum tuar lova thi mi 7 report awmin, Delhi-ah mi 2 thi an awm tawh bawk a ni.
Khawlum nasa tak hian state engemawzat a la tuam mek zel a, chung zingah chuan Delhi, Jharkhand, Uttar Pradesh, Pubjab, Haryana leh Rajasthan te pawh an tel a, Jharkhand-a Palamau chu khawlumna ber record la niin 47°C a ni.
Khawlum hi Andra Pradesh-in tuar nasa berin an state chhungah khawlum vanga thi mi 1490 tling tawhin, Telengana-ah hian mi 489 thi an awm tawh a ni.