Pawl anga hmalakna a hlawhtling duh fo zawk:Chief Minister

MFA President-ah Lal Thanzara thlang leh
Chief Minister Pu Lal Thanhawla chuan sawrkar hma-lakna te lo er tawk leh ti sukuk duhtu an awm ṭhin avangin khaw-tlang leh pawl anga hmalakna a hlawhtling duh fo zawk a ti.
He thu hi nimina Mizoram Football Association General Body Meeting, Berawtlanga neihah a sawi a, Chief Minister chuan Mizote hi kawng tam takah sawrkarah ringawt an innghat thin a, hun lokal zelah pawl ang leh mimal ang ten hma an la chho ve tan a, hlawhtlinna leh hmasawnna pawh a lang chho ve ta a a lawmawm hle a ni a ti a, infiamna lama football-ah ringawt pawh nasa takin hmasawnna hmuh tur a awm a, hei hi association te thawhrim-na leh ṭanrual vang a ni a, an chungah leh mimal ṭhahnem-ngaite chungah lawmthu a sawi a ni.

Infiamna, abikin football leh cricket te chu eizawnna mai nilo hausak theihna a ni tih sawiin, infiamna dangte pawh eizawnna tlak, coach leh referee puitling nihte eizawnna tling a ni a, helamah hian kal dan ngaihtuah a tha hle a ni a ti.

Tun hnaiah India a football inkhelhna sang ber I-League thlen a ni chu miṭha-hnemngai leh association tan lakna rah a ni a ti a, Aizawlah I-League khelh anih theihna turin All India Football Federation hotute nen an sawiho thu te a sawi a ni.

MFA sum dinhmun report ah sum hmuh zawng zawng hi Rs.49,05,433/- a ni a, hmanral zawng zawng Rs.47,20,656/- a ni a, tunah hian kuta la awm chu Rs.2,46,323/- a ni.

2015-2019 MFA Hruaitute:
President  :  Lal Thanzara
Vice President : KC Lalrinmawia
Sr. Vice President: Vanlalhruaia
Hony Secy: Lalnghinglova Hmar
Jt. Secy: C.Vanlalmawia
Treasurer: Tuikhuahthanga
Fin. Secy:  Lalruatsanga Tochhawng

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram