Zothlifim Logo
Loading ...

Health Minister, Pu Lal Thanzara chuan Aizawl-ah mamawhna a sân zawk avangin Specialist Doctor pakhat Serchhip aṭanga transfer chu Serchhip tlawmngai pawl ten an hriatthiam loh chu pawi a tih thu sawiin, Sawrkar tan pawh hmalak dan thiam a har thu a sawi a. Serchhip ah an mamawh zawk Specialist dang pek tum a nih thu sawiin Serchhip khaw mipui te chu Department hmalakna hriatthiampui turin a ngen a ni.
He thu hi nimina Damlo enkawlna tihchangtlun nana Kulikawn Hospital-a Emergency Services leh Dental OPD siam thar a hawnnaah Health Minister hian a sawi a, Health Department hmanrua tlakchham leh mamawh te pawh a remchan anga ngaihtuah chhoh zel tur a nih a sawi bawk.

Kulikawn Hospital ah hian Deputy Medical Superintendent hovin Doctor 28, Nurse 19, Group D 29 leh thawktu dangte nen an zavaiin thawktu 91 an awm a, khum 50 awmin Psychiatry, Gyneacology, Paediatric, Dental, General leh mit entirna te a awm a. Emergency Services hawn thar ah hian Doctor leh Nurse te chhun zan zawmin an duty dawn a ni.