UD&PA Minister hovin retheihna umbo dan tur ngaihtuah

India ram pumpuiah retheihna ûm bo a nih theihna turin Govt of India chuan State tinah a ûm bo dan tur kawng duangtu tur Task Force on Poverty Alleviation din nise a tih angin Mizoram State-ah pawh UD&PA Minister Pu Zodintluanga kaihhruaina hnuaiah din niin nimin khan minister office chamber-ah meeting vawi khatna neih a ni.
Governing Council of NITI Aayog, February 8, 2015-a meeting chuan State tinah Task Force on Poverty Alleviation hi din theih ni se tiin a lo rel tawh a. He task force hian retheihna umbo kawngah central kaihhruainain hma a lak chhunzawm dawn a ni.

Minister Zodintluanga chuan Task Force on Poverty Alleviation din a ni chu thil lawmawm tak a nih thu sawiin, sorkarin mirethei zawkte dinhmun chawi kanna tur NLUP a buaipui mek laiin a belhchhahna tur central sorkarin a han duang leh hian sorkar kut leh ke pawh a tichak lehzual ngei a rin thu a sawi a ni. NITI Aayog hian State tinte chu anmahni state theuhah retheihna umbo nan eng anga hmalak tur nge tih te, mahni state-a retheihna umbona programme neih mek te, leh hma thar lak dan tur awm theite bakah NITI Aayog-in state a tanpui theih dan turte sawi turin a ti a. Pu Zodintluanga hova meeting chuan, retheihna umbo hna thawh kawnga India sorkarin state hrang hrangte tehfung pakhat hmanga funding leh tih tur intuk hi a fel tawk lo hle an ti a, NITI Aayog pawh hian state mil leh tih theih te ngaihtuah a programme leh scheme te duang se, central atanga rem leh rem loa tihtur intuk ngawt lovin state mamawh leh state tana tangkai tur scheme te rilru zau tak pu chunga duang turin Mizoram State duhdan thlen ni se tiin an rel a ni. Tin, Task Force on Poverty Alleviation meeting chuan retheihna umbo leh miretheite dinhmun chawikanna lam kaihhnawih programme/scheme enkawltu hrang hrang department te programme pawh a theihna chin zelah huang khata luantir a, state danga an tih anga convergence uar chhoh zel pawh a pawimawh hle thu an sawi a ni.

A sawi zelnaah Minister chuan, Task Force on Poverty Alleviation hi central sawrkar hian eng ang takin nge a hman tangkai dawn hriat ni rih lo mah se meeting-a Secretary kalkhawmte hnenah chuan mahni department chan theuhah mirethei leh mi harsa zawkte dawmkanna programme an neih theuh te chu hlawk zawk leh awmze nei zawka hma lak pui theuh turin a ngen bawk a ni.

Task Force on Poverty Alleviation-ah hian retheihte dawmkanna scheme leh programme enkawltu department zing ami, Urban Development & Poverty Alleviation Deptt, Rural Development Deptt, Public Health Engineering Deptt, Labour, Employment & Industrial Training Deptt, Industry Deptt, Cooperation Deptt, Agriculture Deptt, GAD, Finance Deptt leh Planning Deptt Secretary-te chu member an ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram