MZP chuan India sawrkar laipui bultuma Bangladesh ram aṭanga dan lo va lo pem lutte dapchhuah beihpui thlak a ni tur chu lawmawm an tih thu an sawi a, Mizoramah pawh Bangladesh aṭanga dan lova lo lut Chakma ṭhahnem tak an awm ve avangin sawrkar laipuiin Bangladesh aṭanga dân lova lut rute dapchhuah beihpui a thlak chhoh mekah Mizorama dan lo va khawsa Chakma te chu kim taka hrût tel an nih ngei theih nana ngenna MZP chuan Union Minister of State for Home Pu Kiren Rijiju hnenah nimin khan memorandum an thehlut a ni.
MZP thuchhuah chuan Chakma te hi Bangladesh aṭangin dan lovin Mizoram chhungah an lo lut nasa hle tih chhiarpui aṭangin a lang thei tih an sawi a, Chhiarpui hmasa ber kum 1901 ah Chakma mi 198 lek an awm laiin tun dinhmunah chuan Mizoram chhungah Chakma mi 1,50,000 vel zet an awm tawh anga ngaih a ni a. An pun chak dan hian Chakma te chu inthlah pun dan pangngai a inthlah pung ni lovin Bangladesh aṭangin dan lovin mi thahnem tak a rukin an lo pem lut tih a nemnghet a ni. Hetiang ang zel a kan kal chuan kar lo ah Chakma te hian Mizoram chhunga Mizote min zat thei mai dawn niin MZP chuan a ngaih avangin, Bangladesh aṭanga dan lova a ruka lo pem lut Chakma te chu dapchhuah an nih theih nan leh dan anga an chunga hmala turin sawrkar laipui leh State sawrkar chu MZP chuan an ngen a ni.
Union Minister hnenah dan lova lo lut Chakma dapchhuah an nih theih nan ngenna thlen
