SERCHHIP: United Nations Organisation in June ni 21 hi khawvel pum huapa “International Day of Yoga” a hman tura a tih angin Serchhip-ah pawh he hun hi hman a ni a, Chief Medical Officer, Serchhip District, AYUSH Department leh Nehru Yuva Kendra Sangathan (NYK) Serchhip ṭangkawp buatsaihin nimin zing dar 7 khan Chief Medical Officer’s Conference Hall, Serchhip-ah inkhawm buatsaih a ni a, Serchhip khawchhunga sawrkar pisa hrang hrang hotu ten he hun hi an hmanpui a ni.
District Bawrhsap Pi Juhi Mukherjee, IAS pawhin he hun hi hmanpuiin India Prime Minister Narendra Modi-a rawtna avanga UNO pawhin he hun hman hi rem ti an ni tih a sawi a, hetih lai hian Hindu sakhaw tihdan ngial ngan a ni e tih ngaihdan mi thenkhat ten an neih avangin hlauhthawnna a awm tih hriat a ni a, hetiang zawng hian tumahin thlir lo se a duh thu sawiin taksa leh rilru hriselna atana a pawimawhna lai hi hmu thiam ila, exercise chi khat ve mai angah ngai thei ila a duhawm hle a ni a ti a, sakhua-na nen lak kawp loh kan thiam angai in ka hria a ti bawk. Taksa a harsatna nei, Yoga hmanga in enkawl duh tan Daktawr rawn chung zela tih a pawi-mawh thu a sawi bawk a ni.
Nimin zinga International Day of Yoga puala inkhawm hi Dr. Laldawngliana Sailo, CMO Serchhip District-in a kaihruai a, Dr. Lalkhawngaihi Renthlei, MO (AYUSH) hnen aṭangin Yoga awmzia leh nihphung power-point presentation hmanga hrilhfiahna hun hman a ni a, NYK, Serchhip thawktuten Yoga exercise tihdan tlangpui sawi-fiahin an kaihhruaina hnuaiah hian mass yoga exercise neih a ni bawk a, Dr. ZD Lalmuan-awma, MD (Opthal)-in lawmthu sawina hun hmangin hnu a khar a ni
International Yoga Day vawi khatna hi nimin khan khawvel pumah hman a ni a, New Delhi-ah chuan he ni hi Prime Minister Narendra Modi hovin Rajpath-ah hman a ni a, mi sang telin Yoga exercise leh pranayam-an entir a ni a, New York khawpuia he ni puala UN Hqrs.-a hun hmanah External Affairs Minister, Sushma Swaraj-i’n thu a sawi a ni.
He Ni puala thuchah a sawiah Prime Minister Pu Modi chuan Yoga chu taksa sawizawi-na chauh nilovin remna leh muanna atana hmanraw pawi-mawh tak a ni, a ti. He ni, Interna-tional Yoga Day atana puangtu United Nations hnenah leh a thlawptu khawvel ram hrang hrangte chungah lawmthu sawiin rilru sawizawina atangin he ni hian remna leh muanna hun thar a hawng dawn a ni, a ti.
Mizoram Pradesh Congress Committee chuan Kristian sakhaw ni serh, Pathianni-a India ram puma International Yoga Day hmasa ber hmang tura ruahmanna siam chu BJP kaih-hruai central sawrkarin a ruka sakhaw dang nek chep a tumna-ah an puh thung. MPCC Media Department-in thuchhuah a siamah BJP kaihhruaina hnuaia Central sawrkar chu Hindu sakhua tih loh, sakhaw dang nep chep zawnga hma la zelah Congress party chuan a puh a ni.
An thuchhuah chuan Yoga hi hriselna atana thil tha tak pawh nise a tobul hi Hindu sakhua a nih miau avangin sakhaw dang betute tan chuan Yoga hmang khera exercise lak hi thil tih theih a ni lo an ti a ni.