Zothlifim Logo
Loading ...

July ni 25-a Aizawl K-Pop contest preliminary round neih turah Korean pop star lar Hyemin Jung a lo tel dawn a, amah hi Korean hmeichhe pop band Gavy NJ member hlui a ni.  KCCI Director Kim Kum-pyoung chuan Korean team-te hi a rawn ho dawn a ni.
K.POP contest chungchanga Korean Cultural Centre, India (KCCI) leh Mizoram sawrkar inbiakna kal zelah nimin khan Chief Secretary Pu Lalmalsawma hovin CS Conference hall-ah meeting neih a ni.

Tarlan tawh angin K POP Contest hi July 25 hian Aizawl ah neih a ni dawn a. A hmun atan Mizoram University Multipurpose Hall, MZU Campus, Tanhril chu thlan fel a ni tawh. Entry ticket siam tum niin ticket man hi  cheng 500 zel a ni ang. He contest buatsaihna atana senso zawng zawng, Hall hire man te, an vahvelna, ei leh in, thlen man, contest huaihawtnana senso engkim hi KCCI in a tum vek dawn a, Mizoram sawrkarin sum leh pai a seng ve dawn lo. Ticket man atanga sum lakluh hi KCCI kuta lut lovin tanpui ngaite tanpui nan Chief Minister’s Relief-ah chhun luh a ni ang a, he contest buatsaih nana hriatlawk loh sum sen tul a awm anih chuan ticket man atang hian rulh a ni ang.

KCCI buatsaih K POP contest a tel tur hian India ram hmun hrang hrang atangin contestant 60 bawr vel an lokal tura beisei an ni a. Contestant-te hi internet kaltlanga intihsiak an neih hnuah preliminary round a tel turin thlanchhuah an ni ang. Online kaltlanga inelna hi a duh apiang tel theih niin June ni 30 thleng hun hawn a la ni a. A tel duhte chuan KCCI website india.korean-culture.org tlawh theih reng a ni. India ramah hian preliminary round contest hi khawpui 7 – Mum-bai, Chennai, Kolkata, Aizawl, Patna, Bengaluru leh Delhi ah te 25.7.2015 atanga 14.8.2015 chhungin neih a ni dawn a ni. Preliminary round paltlangte hian Final Round, Delhi-ah inelna an nei leh ang a. Heta titha zual te hian a thlawna Korea rama zin theihna leh lawmman hlu tak tak an dawng dawn a ni.