Zothlifim Logo
Loading ...

Bru laklet tur te Mizoram mi diktak an nih leh nih loh Kaskau Camp-a endik turah nimin a ni 2-na ah pawh tumah an inlan lo leh a, an inlan loh chhan hi hriat ala ni rih lo.
Tun thla ni 8 aṭanga Bru laklet hna thawk turin Mizoram mi dik tak te endik hna chu niminpiah aṭang khan Tripuraa Kaskau Relief Camp ah ṭan a ni a, hemi atan hian Mizoram sawrkar official te an kal a, endik hna thawk tur hian Mamit aṭangin Team 3 SDC kaihhruaina hnuaiah an kal a, Kolasib leh Lunglei aṭangin an kal bawk a, niminpiah khan an bazar ni nia sawi a ni a, bazar tura an chhuah vanga inlan lo anga ngaih a nih laiin, nimin lamah pawh inlan an awm leh tak si loh avangin, a chhan hi an sawi thuai rin a ni.

Tarlan tawh angin, relief camp-a awm Bru laklet tura ruahmante hi Mizoramah an vaiin an kir duh ang em tih hriat a la ni lova. Tripura Bru Relief Camp 6-a Mizoram Bru awmte hi a intahtawlin laklet an ni dawn a, tuna ruahmanna ang chuan Ningani thleng khian Kaskau camp-a Mizoram Bru awmte enfiah hna thawh tur a ni a, laklet theihte chu June ni 8 leh ni 12 inkarah laklet an ni ang.

Hetiang hian camp dang-ah pawh ti chhunzawmin, laklet hna beihpui thlak tur a ni a, Bru laklet tura ruahman chhin hi naupang 11,446 leh puitling 9,264, an vaiin mi 20,710 vel ni tura rin a ni a; chhungkua 3,455 vel bawr ni tura ngaih a ni.