BSNL Broadband chungchangah Sub-Hqrs. YMA hruaituten hma la

SERCHHIP: Nimin khan Sub-Hqrs. YMA Serchhip Kumpuan Committee chuan Serchhip-a BSNL Internet Broadband Signal mumal lo lutuk chungchangah Serchhip BSNL-a an hotupa ber Subhashish Banerjee, SDE chu a Office-ah lenchilhin BSNL Internet Broadband Signal ṭhat loh vanga mipuiin harsatna nasa tak an tawh mek thu leh a siamṭhat kawnga chak zawka hma la turin an ngen.
Sub-Hqrs. YMA Serchhip Kumpuan Committee hian Serchhip-a BSNL Internet Broadband Signal chu May thla tir aṭang khan hman hleih theih loh khawpin a mumal tawh lo tih an sawi a, a changin chawlhkar khat tawp te signal a awm lova, a awm ve chang pawhin hman hleih theih loh khawpin a muang a, hei vang hian Office hna tam tak a khaihlak phah a, mimal sumdawng tam takin an tuar bawk a, nitiam neia zirlai, phailama kal tur leh sipai chhuṭi haw tur, Rel leh thlawhna ticket la tur ten harsatna nasa tak an tawk a, Gas-a Sawrkar laipuiin Direct Benefit Transfer a kalpui mek a, a subsidised-na pawisa pawh MIZOFED Consumer te Account-ah a lut hlei thei lova, hei hian chhungkaw tam tak a tibuai tih SDE Subhashish Banerjee chu an hrilh a, Serchhip-a Internet Signal leh Speed ṭha a awm theihnana hma la turin an ngen nghal a, thla 2 dawn Serchhip-a Internet Signal mumal loh avang hian Monthly Bill pawh May thlaa mi chu thla chanve chauh siam turin an phût tih an sawi tel nghal bawk.

BSNL Sub-Divisional Engineer Subhashish Banerjee chuan May thla tira Internet chawlhkar khat dawn awm loh chhan chu Entlang BSNL Tower dahna hmuna an khawl pakhat ṭek tla-in a denchhiat vang a nih thu a sawi a, tun ni 2/3 chhunga Serchhip a Internet Signal awm lo chu Vengchung leh Entlang Tower inkara a hrui chah vang a nih thu leh Aizawl lam aṭanga Engineer lo kal ten a zawm hna an thawh mek thu sawiin, a karlaka Internet Signal ṭhat loh chhan chu phailam aṭanga Signal hmuh ṭhat theihloh vang te a nih thu a sawi a, Bill deduct (tihhniam) chung-chang chu a thuneihna piahlam a nih thu leh Sub-Hqrs. YMA ngenna chu Aizawl lama a lo forward tur thu a lo hrilh a ni.

Sub-Hqrs. YMA Serchhip hruaitute chuan BSNL service-in mipuia nghawng a neih thuizia Subhashish Banerjee chu hrilhin an Service a harsatna an nei a nih chuan TV leh chanchinbu kaltlanga mipui hnena hrilh hre ṭhin turin an ngen a, Serchhip-a 3G Internet Function tawh anga sawi, a taka hman mumal theih ni si lo chungchangah te pawh a rang lama hma la turin an ngen bawk a, Subhashish Banerjee chuan Sub-Hqrs. YMA hruaitute ngenna chu a theih ang anga bawhzui a lo tiam a ni.