Zothlifim Logo
Loading ...

Pathianni khan Tripura-ah Chakma National Council of India, Central Committee hruaitute an thukhâwm a; State hrang hrang atanga palai kalkhâwmte chuan resolution siamin, Chakma-te thliar hrannaa ngaih theih tura tunhnaia Mizoram sorkar thutlûkna chu an dem tih an tárlang.
Tripura ramchhung Manu-a Sailengta Town Hall-a Pathiannia an thutkhâwmnaah hian Tripura State Committee of CNCI din nghal a ni a; hmarchhak state hrang hranga Chakma dinhmun zau zawka an sawiho bakah Chakma nationalism uar lehzuala kalpui dan tur an sawiho a ni.

Chakma-te chu tunhma atanga Asia chhimchhak hrúl hmun hrang hranga lo chêng tawh nia an inhriat thu sawiin, “Chakma-te hi Indian sub-continent-a hnam upa berte zinga mi kan ni,” an ti a, tuna India hmarchhak state hrang hrang – Assam, Tripura leh Mizorama an awmna chu India-in zalenna a hmuh hma atang tawha an luah tawh niin an sawi.

Bangladesh ramchhunga awm Chittagong Hill Tracts chu India rama bet tel tur nia an ngaih thu, CNCI hruaitu kalkhâwmte chuan sawiin, helaia chêng zaa 97 te chu Muslim sakhaw zuitu an ni lo chungin Pakistan-ah tihluih-naa behluihtir an ni tih an sawi a; hei hi Bengal Boundary Commission ngaihdan kalh nia an hriat thu sawiin, Bang-ladesh-a Muslim sakhaw zuitu Bengali-te’n Chakma-te chu an nêkchêp phah niin an sawi.

Chakma National Council of India hnuaiah hian state pathum – Mizoram, Assam leh Tripura-ah te State Committee din tawh a ni a; Pathiannia an din thar Tripura State Committee-ah hian President atan Sabha Ranjan Chakma ruat a ni.