Nimin khan Agriculture Minister Pu R. Lalzirliana chuan New Secretariat Complex, Khatlaah Agriculture Department hnuaia Custom Hiring Centre thara hman tur Tractor 12 a vai liam.
Pu R.Lalzirliana chuan loneitute hman tur tractor rual an pe chhuak leh ta chuan Mizoram sawrkar kal tum dan leh kal mek dan a tilang chiang hle, a ti a. Sawrkar chuan lonei-tuten awlsam leh hlawk zawka hna an thawh theihna turin hma a la zel a, kum 2009 aṭang khan subsidy in power tiller 913, mini power tiller 360 leh tractor 62 an pe chhuak tawh a, kumin chhung hian power tiller 410 leh mini power tiller 285 pekchhuah tur chu sem chhuah ṭan mek a ni, a ti a. Mimalah ni lovin custom hiring centre-ah loneitu intel-khawm (society) te hnenah sawrkarin man tlawm te in Tractor leh a hmanraw dangte a pe a, anmahnia inrelbawl turin a ruahman a. Heng custom hiring centre te hi tun dinhmunah 7- Phaizau, Middle Phaisen, Kaihzawl, Zawlpui, Lumtui, Phaidung-I leh Ngengrual-ah te a awm mek a, 40 neih belh tum niin heng zinga Centre 28 chu peihfel a ni tawh, Agriculture Minister chuan a ti.
RKVY hnuaiah Custom Hiring Centre, Aizawl District-ah 3, Lunglei District-ah 4, Saiha District-ah 2, Champhai District-ah 4, Kolasib District-ah 4, Serchhip District-ah 2 leh Mamit District-ah 2 dah tura ruahman a ni a. SMAM hnuai-ah chuan Aizawl, Champhai, Kolasib leh Serchhip District-ah 1 theuh dah tura ruahman a ni bawk. Custom Hiring Centre-a an pekte hi Tractor 12 bakah Trailer, Rotavator leh buhhmun thlawhna khawl Paddy Weeder te a ni.