Dân lama mipui te kan la thangharhlo pawi ti

Mizoram Police Subordinate Officers Association (MPSOA) chuan tunhnaia Thingdawl khuaa pawng-sualtu Police kuta awm tawh, mipui thinrim sahawkin lak chhuah an tum avanga Police te boruak bengdaihna tura van lam hawia Silai hmehpuah hial ngai khawpa Dan lama mipuite an la ṭhangharh lo chu pawi an ti tak zet tih an sawi.
Nimin khan thuchhuah siamin, Police awm chhan ber chu mipui venhim leh misualte Dan anga hrem a ni tih hi Mizo mipuite hian hre nawn se an duh tih an sawi a. Police te hian misual te hi an chhanhim duh hrim hrim vang ni lovin hrem turin an buatsaih zawk tih an sawi a, An thian ten an duty dik tak tia huaisen taka an tih tur an hlen chu an chhuang tak zet tih an sawi,

Police kuta awm tawh misualte hmuh leh kutthlak tum luih avangin vawi tam tak mipuite chu Police ten an lo hmachhawn tawh a, Sorkar bungrua engemawzat chhiain Police leh mipui hliam tuar engemawzat an awm tawh bawk thin tih tarlangin, Misualte do a tangrual thin leh tangrual tur zawk Police leh mipui pawisawilote inbei chiam a, misual zawk kha an kel-e-awl hlauh thin chu mipuite tawrhna leh thihna hial thleng thei tur thlir lo a, mahni kuta Dan kenkawh ve chak mi tlemte ten mipui an fuihpawrh thin vang a ni an ti a, hriatlohna avangin mi thenkhat ten tul miah lovah Case an neih phah hial thin chu a pawi em em a ni an ti.

MPSOA chuan hetiang sual, mipui zawng zawngin mal-mak leh lungten chi a lo thlen hian ngaihtuahna fim takin hmang a, tul lo leh awmze nei lo a buaina lakah mi zawng zawng inthiarfihlim tura chahin Ram danin khua leh tui tha te mawh-phurhna hlen tura a beisei ang ngeiin, fim tak leh awmze neiin, misualten an phu tawk hremna an hmuhtheihna tura Police-te thawhpui zel turin mi zawng zawng an ngen tih an sawi a. Mi vanduai te tawrhna thleng thin chu pawl bik hamthatna atana remchanga kaih luh tum tawh lo turin Political Party zawng zawng an ngen bawk a ni.