De La Hoya-a’n Boxing-a a kir leh dawn leh dawnloh a ngaihtuah

Boxer ropui te zinga mi Oscar De La Hoya chuan kum 42 a nih tawh hnuah Boxing ring chhunga kir leh chungchangah rilru a sêng nasa takzet tih a sawi.
Weight chi hrang 6-a champion thei, De La Hoya hian kum 2009 khan boxing a chawlhsan a, Manny Pacquiao a hnehloh ṭum kha a inhnek hnuhnun ber a ni.

De La Hoya chuan, “Ka kir leh duh chhan chu he competition-a a ṭha thei ang bera khelh hi nuam ka tih vang chauh a ni,” tiin a sawi a, De La Hoya hian Boxing a chawlhsan hnuah Boxing Promoter-ah a ṭang a, mahse zu leh drugs vangin a buai nasa em em thung a ni.

De La Hoya chuan kir a duh leh duh lohna chu ’50-50′ a nih thu a sawi a, “Sum chungchang avanga kir leh duh ka ni lo,” tiin a sawi a, “Tunah chuan ka rilru leh ka takza pawh a ṭha tawh hle-in ka hria, a chhan chu rei tak zu ka khawih tawhlo a ni,” a ti bawk.

De La Hoya hian boxing a khelh chhungin mi 39 a hneh zinga mi 30 te chu knock-out-a a hneh te an ni a, ṭum 6 chak loh a nei a, Featherweight, lightweight, light welterweight, welterweight, light middleweight leh middleweight-ah te a champion a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram