French Open: Federer leh Nadal-a’n Semi-Final thleng lo

Second Seed leh 2009 champion Roger Federer chuan Semi-final a thleng zo ta lova, nizan hmasa khan a hnampui, Stan Wawrinka lakah 6-4, 6-3, 7-6 (7-4)-in a tlawm a ni.
Kum 30-a upa, Wawrinka hian kum 33 mi, Federer hi tun hmaa Grand Slam Tournament-a vawi 4 a hmachhawn tawhah a lo hnehlo vek tawh a, mahse a vawi nganaah chuan a hneh ve ta thung a, Wawrinka hian Semi-Final-ah French player Jo-Wilfried Tsonga a hmachhawn dawn a ni.

Tsonga hian Semi-Final thleng tur hian harsa takin Kei Nishikori a paltlang a, Tsonga hian 1st set leh 2nd Set a lak hnu-ah Nishikori hian 3rd set leh 4th Set a la ve leh a, mahse a tawpah Tsonga hi 6-1, 6-4, 4-6, 3-6, 6-3-in a chak ta zawk a, Tsonga hian kum 2013 khan he hmunah hian Semi-Final alo thleng tawh a, kum 1983-a Yannick Noah-a’n Roland Garros-a title a lak hnu khan French zingah he hmuna title la leh thei hi an la awm lova, Tsonga hian la thei tak maw?

Federer hnehtu, Wawrinka chuan, “Vawiin hi clay-a ka khelh ṭhat ber ni a ni a, ka tan chuan hun danglam bik tak a ni,” tiin a sawi a, 2014 Australian Open Champion tan hian tun ṭum hi French Open semi-final a khelhna hmasa ber tur a ni.

Nizan khan hmeichhe Top seed Serena Williams pawhin Semi-Final a invaw kai a, Quarterfinal-ah Sara Errani chu 6-1, 6-3-in a hneh a, Semi-Final-ah hian 23rd Seed Timea Bacsinszky a hmachhawn dawn a, Bacsinszky hian Alison Van Uytvanck chu 6-4, 7-5-in a hneh a ni.

Nizan vek khan Mipa Quarterfinal ngaihven hlawh berah No. 1 Novak Djokovic chuan Rafael Nadal hnehin Semi-Final a thleng bawk a, Djokovic hian 7-5, 6-3, 6-1-in Nadal hi a hneh a ni. Djokovic hian Andy Murray a hmachhawn dawn niin a lang.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram