French Open: Ka Career-a Quarterfinal khirh ber a nih ka ring:Nadal

Rafael Nadal chuan French Open-a Novak Djokovic a hmachhawn tur chu a career-a Quarter-final khirh ber a nih a rin thu a sawi.
French Open-a vawi 9 champion tawh Nadal chuan Roland Garros-a ṭum 70 a chakna ni turin Round 4-ah Jack Sock chu 6-3, 6-1, 5-7, 6-2-in a hneh a, Nadal hian Open Era-a Grand Slam pakhata title 10 la thei hmasa ber nih tumin a bei mek a ni.

Djokovic hian Quarter-final thleng tur hian Richard Gasquet chu 6-1, 6-2, 6-3-in a hneh a ni.

Vawiina kum 29-na birthday lâwmtu, Nadal hian French Open bikah Djokovic hi ṭum 6 lai alo hneh tawh a, amah-erawhchu tunhnaiah Nadal hi a che ṭhalo hle a, nikuma Paris-a title a lak hnu khan tournament pakhatah chiah champion-na a nei a, Quarter-final-a a hmachhawn tur Djokovic hi hnehlo nei lovin match 26 chhung zet a awm tawh thung a ni.

Hmeichhe lamah 4th Seed Petra Kvitova chuan Round 4 a paltlang zo lova, 23rd Seed Timea Bacsinszky lakah 2-6, 6-0, 6-3-in a chaklo a, Belgian nula, Alison van Uytvanck chuan a vawi khatna atan Grand Slam Quarterfinal a thleng a, Andre Mitu lakah6-1, 6-3-in a chak a, Uytvanck hian kumin tello hian tunhmaa Grand Slam vawi 6 a khelh tawhah match 1-ah chiah hnehna a la chang a ni.

Nimina Hmeichhe Quarterfinal khelhah 7th Seed Ana Ivanovic leh Lucie Safarova te chuan Semi-Final an thleng a, Ivanovic hian Elina Svitolina chu 6-3, 6-2-a hnehin Semi-final hi a thleng a, Semi-Final-ah hian Safarova a hma-chhawn dawn a, Safarova hian Garbine Muguruza chu 7-6 (7-3), 6-3-in a hneh ve bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram