Larsap Lt. General Nirbhay Sharma chuan YMA Day vawi 80-na vawiina lo thleng turah Mizoram chhung leh pawna YMA member zawng zawngte chibai bukin duhsakna a hlan.
YMA Day puala thuchah a siamah Larsap chuan Mizorama tlawmngai pawl lian a nih avangin YMA hian khawtlang nun leh ei leh bar hmasawnna kawngah a thawh hlawk em em a ni a ti a. Mizo nun ziarang humhalh leh tihhmasawnna kawngah a ṭangkai hle a; chhiatna lo thlenin sorkar leh mipui tan theihtawpin tha an thawh ṭhin a ni a ti. ṭanpui ngaite tan YMA chu ṭanpui vartu hnai reng leh an innghahna a ni a ti a. YMA-in khawtlang eichhe mektu ruihhlo an do kawnga an hnathawh ropui tak chu thlawp ṭheuh turin mipui a ngen a ni.
Vawiina YMA Day lawmna hi kum dang ang bawkin ṭanpui ngaite ṭanpui leh thil ṭha tihna atan hman a ni ang a, Branch hrang hrangte chu an ngaih pawimawh zawng te ti tura zalenna pek an ni.
Central YMA Treasurer Pu J. Lalsailova chuan Central YMA chuan YMA day chu tanpui ngaite tanpuina ni atana hman a nih thin thu a sawi a. Branch tinin an ngaih pawimawh zawngte an ti ang a; mirethei in sak sakte, thisen pekte, thing phunte, veng leh khaw chhung tihfaite; Dam-dawiin leh hnuchham chawm-na ina awmte ei tur leh thil pek dang pekte a huam vek a ni a ti a. Central YMA hruaitute chuan hmun hrang hrangah YMA Day lawmna hi an hmanpui dawn niin a sawi a ni.
Hetihlai hian vawiin YMA day hi Excise and Narcotics Commissioner chuan zu hralh chhuah loh ni ‘dry day’ atan a puang a ni.