Nimin khan IASE Auditorium-ah National Seminar on 21st Century Challenges in Teacher Education neih a ni a, Governor Lt. Gen. Nirbhay Sharma, PVSM, UYSM, AVSM, VSM (Retd) chuan khuallian niin a hmanpui a, Parliamentary Secretary Pu H. Zothangliana chu khualzahawm a ni.
Governor chuan, tunlai khawvela chona lian ber chu tunlai mila zirtirna pek thiam hi a ni a, Mizoram pawh India ramah ziak leh chhiar thiamah pathumna kan ni a, mahse hei hian eizawnna ṭha leh hauhsak-na a keng tel kher lo a ni a ti. Kan ṭhalaite hian Graduate leh Post Graduate degree ringawt ni lo sumdawnna emaw kawng dangah eizawnna tlak thiamna an mamawh hle nia a hriat thu a sawi a. Governor chuan sawrkar hnathawk mithiamte leh zirtirtu te hian kan naute hi an ṭhan chho zel nan zirna tluantling nei tura zirtirna an pek a tul hle a ni a ti a, tun hma lama zirna kan lo kalpui tawh dan ang chu thlak danglam a hun tawh hle a ni, a ti a. Ram leh hnam tana chhawr tlak zirna tluantling kan neih theih nan mipakhat chauh phur a tawk lo a, zirtirtu ṭha kan mamawh rualin zirlai naupang mahni tuma chiang leh nu leh pa fate kalna tur ngaihtuahpui thiam leh an fate phurpui thiam kan mamawh a ni, a ti.
Institute of Advanced Studies in Education (IASE) hi kum 1975 khan Mizoram Institute of Education tiha din a ni a, tun ah hian zirtirtu 20 awmin, B.Ed (regular), B.Ed (Multi-Mode Programme) leh M.Ed zirtirna an pe mek a ni.