SERCHHIP: Mizoram Consumer Union (MCU) chuan eirawngbawlna gas man tova leitute bank account-a a man tona zawng chhunluh theihna tur ruahmanna chu LPG Distributor ṭhenkhatin an zawm ṭha tawklo niin an sawi.
MCU hian Inrinni khan thuchhuah siamin Central sawrkarin ruahmanna a siam, Direct Benefit Transfer for LPG an tih mai tihlawhtling turin Mizoram Sawrkar-in chak takin hma a la niin an sawi a. Sawrkar chuan State level Monitoring Comittee dinin LPG Service chu a ‘Scheme’ leh Oil Company Policy Dan ang taka Consumer ten Gas ṭha tak an hmuh theih nan hma a la a ni an ti a. Hetihlai hian Distributor tam zawkin Sawrkar thu chhuak leh Company kaihhruaina an zawm duh loh avangin Consumer te’n an tuar mek niin an sawi a ni.
An thuchhuahin a tarlan danin Distributor te’n Sawrkar leh Company dan an zawm tur zingah Consumer Card-ah Gas lak ni (delivery date) an ziak ngei
tur a ni a, Cash memo an pe chhuak
ngei tur a ni tih a ni a. Distributor te’n Consumer Card photocopy an phut (demand) tawhlo tur a ni bawk. Hetianga tih a nih chuan gas connection neitute’n pawisa (subsidy) an dawn loh pawhin Cash Memo leh Consumer Card-a ziah hi a la ṭangkai dawn a, document a nih bakah tih ngei ngei tur a nih avangin an pe chhuak ngei tur a ni an ti.
Central Sawrkar thuchhuak leh duhdan hi Distributor ten an consumer te an hrilhfiah tur a nih thu an thuchhuah chuan a sawi a. Gas connection neitu-in LPG Consumer No. leh Bank Account No. te Form 3 leh 4 hmangin (Adhaar Card nei tawh chuan Form 1 leh 2 hmangin) an tih fel hnu-ah, National Payment Corporation of India kaltlangin Permanent Advance Rs.568/- chu a bank Account ah a lut tur a ni a. Consumer in Gas a lâk apiangin ni 2/1 chhungin ‘subsidy-na’ Account ah a lut tur a ni. A lut lo a nih chuan Distributor-ah Consumer No. leh hming leh Mobile No. te ziakin thlen a, MCU office-ah a copy pek zel tur a ni bawk a. Gas la si lova Account ah subsidy a luh chuan consumer lak ai midang hnenah pek a ni thei a, gas hi kumkhat chhungin bur 12 chauh subsidy-na pek theih a ni a, a bak chu subsidy pek theih a nih loh avangin a man to a lak zel tura ruahhman a ni.
Central Sawrkar ruahmanna angin Gas hi Mobile leh IVRS hmanga book ve ngei a nih theih na’n Mizoram a Distributor te tihpuitlintir ngei turin MCU chuan IOC Limited a phut tlat tih tarlan a ni bawk a.
Gas Consumer Card neitu a thih vang te, chhungkhat ni thin fapa emaw fanu emaw unau te in hrang chang te hnenah gas connection hming thlak in Pawisa chawi a ngai lo a. Heng bakah hian voter ID nena hming inmil lo, hnam hming dah loh vang emaw te a consumer card-ah KYC Form hmang a tihdikna siam tur a ni a, pawisa chawi a ngai lo bawk a ni.
Harsatna nei chuan MCU office-ah Consumer No. leh Hming, Distributor Hming leh mahni biak pawh theihna No. leh chenna hmunte, pawisa chawitir zat emaw harsatna nei chuan an hnena thlen zel turin an ngen bawk a ni.