Lungleia zu dawr khartir lehnghal; Prebyterian Kohhran Zarkawt ten lungawi lohna lantir tawpsan

MLPC Act hnuaiah Inrinni khan Lunglei a Zu Dawr hmasa ber chu Ramthar (AOC) ah hawn a ni a. Darkar reilo te chhung hawn a nih hnuah Ramthar VC leh YMA te ngenna vangin khar leh nghal a ni. Darkar reilo te hawn a nih chhung hian mi thahnem tak an in tlar hman a, a tlem berah cheng nuai 1 man bawr vel chu an hralh chhuah hman rin a ni.  Ramthar Joint NGO chuan Southern Wineshop neitu hnenah hian an vengchhunga wineshop siam lo tura ngenna an thehlut leh dawn bawk niin thulakna chuan a tarlang.

Hetihlai hia Zarkawt Presbyterian Kohhran chuan an veng chhunga zu dawr awm tihtawp ngiata ṭhutkhawm (sitting demonstration) an neih chu Inrinni chawhma lam khan an titawp.

Zarkawt kohhran hruaitu te hian Zirtawpni tlai khan Chief Minister Lal Thanhawla chu hmu-in an veng chu missionary te iptepui bânna hmun, sikul leh biakin awmna hmasa,

A AW B siamna leh Bible lehlinna hmun a nih vang tein zu dawr hawng lo turin an ngen niin an sawi a. Chief Minister hian an thu thlen chu sawrkara a thawhpuite lo sawipui a tum avangin beiseina sang tak nei chungin an titawp ta niin an sawi.

Zarkawt-ah hian MAMCO chuan zu dawr hawngin he dawr hi titawp turin leh mipuite pawh lei lo tura ngenin dawr bulah hian Zarkawt kohhran mi eng emaw zat an ṭhu ṭhin a.

Zarkawt kohhran hruaitute chuan zu lei turte chu an dang bur lo nia sawiin, a duh chuan an lei tho a; mahse, an ngenna zawmin mi tam tak chuan an lei loh phah tih an sawi a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram