Mizoram hmun hrang hrangah World No Tobacco Day hmang

Khawvel pum huapa Vaihhlo leh a kaihhnawih dona ni’ World No Tobacco Day’ chu nimin khan Mizorama district hrang hrangah hman a ni a, Aizawlah chuan Lal Thanhawla Auditorium, Treaury Square ah Chief Minister Pu Lal Thanhawla hovin urhsun taka hman a ni.
Chief Minister chuan Vaihlo, zuk leh hmuam hi thil sual a ni a ti a, sawrkarin meizuk khapna hmun a siama zu luite chu man theitu ruatte bakah police zawng zawngin man thei tura ngaihtuah a ni ang a ti a. Mizoram mipui zaa 67 chu zuk leh hmuama fihlimlo an ni a, India rama a sang ber a ni hial ang a ti a.

Chief Minister chuan zuk leh hmuam hi puar leh fanna pawh nilo, a thlawna sum khawralna chauh a ni a. Heti chunga zuk leh hmuama insen hreh lo hle te chuan pawisa ka neilo an ti ṭhin chu inbihchiannan hmang se a duhawm hle a ni a ti a. Zuk leh Hmuam hlauhawmna hi la puandarh deuh deuha, la tlangau chhohpui zel ala ṭul hle a ni a ti a. Central sawrkar chuan tuna sikret kawma vaukhanna leh sikret zuk hlauhawmna milem tarlan pawh hi hei aia ti langsar turin thupek a chhuah tawh a ni a ti,

He inkhawmah hian IIST(M) President Pi Lal Riliani pawhin thusawiin, vaihlo hi do tham a awm a, do ala ngai hle a ni a ti.

World No Tobacco Day hi World Health Organisation hian kum 1987 May ni 31 atang khan kumtin khawvel pumah hman thin a rel a. Kumin hian Pathianni ah a tlak avangin Mizoramah chuan nimin khan hman a ni ta a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram