Mizoramah pawh Maggi zawrh leh hralh khap ve dawn

SERCHHIP: Mizoram sawrkar chuan noodle packet lâr tak Maggi chu zawrh leh hralh a khap ve dawn ta.
Health Department-a Joint Director (Food and Drugs Administration) Pu Lalsawma sawi danin India rama ei leh in atana tlak leh tlakloh thu-a thuneitu sâng ber Food Safety and Standard Authority of India (FSSAI)-in Nestle company siam Maggi hi mihring ei atana hrisello tia a puan tak avangin Mizoram sawrkar pawhin hma a la ve nghal a. Vawiin hian Maggi zawrh leh hralh khapna thupek hi chhuah tum a nih thu a sawi. A hmaa state ṭhenkhatin an khap tawh laia Mizorama khap a nih ve lohna chhan chu FSSAI-in thutlukna a la siam loh vang niin a sawi a ni.

Hetihlai hian eichawp leh nepnawi dawr tam takah Maggi hi an la zuar a; chanchinthar ngaithla leh en ṭhenkhatin an lei duh tawhloh laiin hre lova lei leh ei an la awm mek a. Aizawl hmun ṭhenkhatah chuan an hralh zat a tlahniam deuh thut niin an sawi.

Hetihlai hian tun hnaia Energy Drink thenkhat zawrh leh hralh sawrkarin a khap chu mipui ten an lei loh nan nasa taka hmalak chhoh mek a nih thu Health department hotute chuan an sawi a. Energy Drink zawrh khap zing a mi Tzinga chu Mizorama Super Distributor SLT Liana & Sons te chuan an hnena lei chhawng dawrkai tê zawkte chu an hnenah kir tura an hrilh darh thu an sawi a. Mizoram sawrkar aṭanga hriattirna an dawn hma-in Company lamin zuar chhuak lo tura an lo tih tawh avangin thla khat vel kalta aṭang khan an dawr aṭangin an zawrh chhuah tawh loh thu an sawi a. An hnen aṭanga la te paw’n a rang lama an hnena kir vat tura an duh thu an sawi bawk a ni.

Zirtawpni khan Health department-a Food Safety Commissioner chuan energy drink ?henkhat – Monster, Tzinga, Cloud 9 Pomegranade/Grape leh Akoaroma te chu Mizoram chhungah zawrh leh hralh khap a nih thu a puang a. Monster, Tzinga, Cloud 9 Pomegranade/Grape leh Akoaroma te chu sorkar laipuia Food Safety & Standards Authority of India-in mihring hriselna atana ṭha loa a ngaih avangin India ram pumah zawrh leh hralh a khap a nih thu thuchhuahah hian tarlan a ni.

Maggi leh Energy Drinks palite bakah hian khawchhak lam chhuak eichawp thil pawh enfiah a ni dawn a. Pu Lalsawma chuan Wai Wai leh Rum Pum leh khawchhak lam aṭanga lakluh zawrh chhuah te chu a rang lama endik an tum thu a sawi bawk a. Tun hnaia energy drink ṭhenkhat zawrh leh hralh an khap chu mipuite’n an lei loh nan nasa taka hmalak chhoh mek a ni a. Dawrkaia thil zawrh kamram, eichawp mai theih mihring tana hrisel chiah lo nia an hriat te chu endik zel an tum a, thawktu an indaih loh avang erawh chuan duh angin an endik tam hlei thei lo tih a sawi a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram