Nimin khan Mizoram Journalists Association President Pu Vanlalrema Vantawl chuan Mizo Zirlai Pawl (MZP) in Eirukna lak ata fihlim Mizo Politician leh Mizo Officer thlanna a buatsaih chu MZP Conference Hall, Treasury Square ah a hawng a, MJA President hian a hmasa ber atan vote a thlak nghal a ni.
Eirukna laka fihlim thlan ṭanna inkhawm hi MZP Vice President Pu Lalsangzuala Ngente in a kaihruai a, khuallian Pu Vanlalrema Vantawl chuan MZP thiltih tur chu a ṭha lama mipuite cho chhuahna ni thei se a duh tih a sawi a. “Mi chanpual chhuhsak duhna hi zahawmna hralhna, thuneihna hmansualna leh pawikhawihna lian tak a ni a. Mi corrupt te hi an tluang ngai lo a ni,” a ti. MJA President chuan eiru nia hriat te hremna pek an ni manglo chu pawi a tih thu sawiin hei hian midang zelah eiruk pawi tihlohna a thlen nia a hriat thu sawiin, “Eiru te kan huat a, eiru lote kan ngaihsan chuan kan ramin hma a sawn dawn a ni,” a ti bawk.
Thusawitu dang MZP President Pu Lalhmachhuana chuan an hmalakna tur chu a phurawm rualin a huphurhawm hle nia a hriat thu a sawi a. “Thil ṭha ti tur chuan ram hmangaih kawr hak a ngai a, tun tuma kan thil tihtur hian hun lokal zel turah mi dik leh tha ngaihsan an nih theihnan leh entawn tur dik an awm theih nana MZP chuan hma la kan ni,” a ti a. Eiru laka fihlim thlangtu turte chu thianghlim taka vote thlak turin a ngen bawk.