An thudawn bawhzuiin Indian Army Special Forces chuan Thawhlehni zing lam khan hmannia Manipur-a sipai 18 lai kap hlumtu hel pawl te inkhuarna, India leh Myanmar ramri hrul, Myanmar ram chhunga hmun 2-a awm chu an bei a, hetah hian hel pawl engemawzat thah an ni.
Hel pawl camp beih tur hian Indian Army 21 Para Special Forces leh Indian Air Force te ṭangkawp chu tirhchhuah niin, Advanced Light Helicopters (ALH) an hmang a, zing lam dar 3 velah beihpui hi thlakin hel pawl tawmkuk chhut chhiat nan hian minute 30 vel hun an hmang a ni.
Ramri kânin India sipai te hi che mahse India chuan hemi chungchangah hian Myanmar aṭangin sawiselna a awm a ring lova, a chhan chu kum 1990-a ramri kâna Operation neih chungchanga ram pahnihte inremnaah hian ṭhenawm ramri Km. 15 chhungah chuan kal an lo remti ve ve tawh a ni.
Heng camp pahnihah hian hel pawl 150 vel an awm nia hriat a ni a, mi 15 vel an kaphlum nia report a ni a, hliam tuar 11 vel an awm a, hetihlai hian sipai lam erawh chu thi leh hliam an awm lo a ni.
Hel pawl te beih tura inpuahchahna hi ni 5 kalta vel aṭanga ṭan tawh kha niin NDTV chuan a tarlang a, he Operation neih tur avang hian National Security Advisor Ajit Doval chuan Bangladesh-a Prime Minister zuia a zin pawh pawt tawiin, Army Chief Dalbir Singh Suhaag pawhin UK-a zin a tum chu a ṭhulh a, an pahnih hian he Operation neihna tura ruahmanna siampui turin Manipur lam hi an pan niin a tarlang a ni.