Zothlifim Logo
Loading ...

Nestle India chuan Maggi chungchanga harsatna an hmachhawn lai mekin harsatna dang hmachhawn tur a thleng leh niin a lang a, naute hnute tur (milk powder) an siamah lung (pangang hmul neilo (larva)) a awm niin sawi a ni leh.
Coimbatore-a cheng Prem Aananth chuan a fa phir te ei tura Nestle siam NAN PRO 3 a lei chu a fate a pek hnu-ah a fasen pakhat zawk chu a taksa a bawl vak tih a sawi a, Food Safety Authority-ten an test hnu-ah pangang/lung hi a nung lai a awm ngei tih hmuhchhuah a ni a, he bawnghnute phut hi ei/in atan a ṭha tawklo tih an sawi a, hei vang hian ramchhung hmun hrang hrang aṭangin test tur sample an lakhawm leh a ni.

Maggi chungchangah pawh harsatna an tawh belh zel a, Delhi sawrkar chuan Maggi sample an test bawm 13 zinga bawm 10-ah lead a tam lutuk tih an finfiah thu an sawi a, Delhi Health Minister chuan Noodles dang zawng zawng pawh an test tur thu a sawi a. Delhi-ah hian ni 15 chhung Maggi hralh chhuah a khap nghal a, hetihlai hian Indian Army pawhin a sipai te chu Maggi ei lo turin a ti nghal a, sipai Canteen-a stock la awm te pawh thupek dang awm hma chu dah ṭha rih turin an ti nghal bawk a ni.

Kerela pawhin sawrkar dawr 1300 vela Maggi an zawrh chu a tihtawptir tawh bawk a, hetihlai hian Goa Food and Drugs Administration (FDA) erawh chuan Maggi sample an test-ah chuan MSG leh Lead (suan) an hmuh loh avangin mihring tan ei a him tih an sawi ve thung a ni.

Maggi siamtu Nestle company lam chuan Maggi chu ei atan a him tih an sawi a, tunah rih chuan State leh Central FDA thuneitute aṭangin Maggi an siam chhuah lakir tura thupek an la dawng lo tih an sawi ve thung a ni.

Ram Vilas Paswan, Union Minister for Consumer Affairs and Food chuan Maggi-ah hian hrisel-na tichhe thei thil a awm tih hmuh-chhuah a nih chuan company lak-ah hian action lak a nih tur thu an sawi a, West Bengal sawrkar chuan Maggi bakah hian comapny dang siam snack lam chu pawh test turin thupek a siam tawh a, Lays leh Kurkure-ah pawh complaint an dawng tawh tih an sawi bawk a ni.