NITI Aayog Adviser-in Mizoram rawn tlawh

Planning Commission thlaktu, sawrkar laipuia National Institution for Transforming India (NITI) Aayog Adviser BK Pandey leh official dangte’n Mizoram an rawn tlawh.
Pu BK Pandey rual hian West Bengal sawrkara P&RD Commissioner Pu Dibyendru Sarkar leh Sikkim sawrkara RM&D Additional Secretary Pu Anil Raj Rai te an lo kal a. Mizoram Chief Minister Pu Lal Thanhawla’n Mizorama faina beihpui thlakna kawnga sawrkar leh khawtlang thawhhona ṭhatzia a sawi chu ram chhung hmun danga chin ve tlak a ni em tih zirchiang turin an lo kal a ni.

An châm chhung hian Mizoram sawrkara UD&PA leh PHE Department official-te kaihhruaiin ITI Veng, Aizawl Municipal Council, Baktawng leh Seling an tlawh a ni.

Niminpiah chawhnu khan Aizawl lo thlengin PHE Minister Pu Zodintluanga chu a pisaah an hmu a. Aizawl khawpui chep tak karah khawpui fai taka an vawng thei chu lawmawm an tih thu an sawi rualin bawlhhlawh hman nawn theih chi leh nakin zela leiṭhaa la chang mai thei tur biodegradable waste thliar hran a nilo erawh pawi an tih thu an sawi a. Minister chuan hemi kawngah hma chak taka an lak mek thu leh Solid Waste Management atan project pawh duan niin sawrkar laipuiah DPR thehthlak a nih tawh thu a lo hrilh a ni.

An team hian Aizawla feng fai ber nihna lo hauh fo tawh ITI veng tlawhin YMA leh khawtlang hruaitute an kâwm a. Tlawmngai pawl YMA leh a dangte kaltlanga mipui mimirin lungrual taka an veng leh khawtlang a lo fai zawkna tura an thawhhona chu entawntlak an tih thu leh hmun dangah pawh he thil hi kalpuia hman ve tlak nia an ngaih thu an sawi.

Aizawl Municipal Council pawh tlawhin an Chairman Pu CT Zakhuma leh CEO Pi M Zohming-thangi leh Executive Councillor dangte’n an lo dawng sawng a. Central sawrkarin Swachh Bharat Abhiyan a kalpui hma daih kum tam tak chhung Mizoramah faina hapta hman a lo nih tawh dan te an sawi a. Nimin khan Tuiriala bawlhhlawh paihna hmun UD&PA dumping ground, Baktawng Tlang-nuam leh Seling khuate an tlawh a, khawtlangin bawlhhlawh an paih dan leh sawngbawl dante an enfiah hnuah Mizoram an chhuahsan a ni.