India chuan nizan khan 2018 World Cup Qualifying-a an match hmasa berah Oman lakah 2-1-in an tlâwm.
Nimina Kanteerava Stadium, Bangalore-a khelah hian Oman tan Wasim chuan minute 1-naah Oman tan goal a thun nghal a, mahse minute 26-naah Sunil Chhetri chuan India si phurh hi a sut a, Imad Al Hosani chuan minute 40-naah penalty aṭangin Oman goal 2-na a thun a, hei hi Oman hian an chakpui ta a ni.
Minute 69-naah India tan Robin chuan goal a thun a, mahse linesman chuan Offside a tih avangin goal-ah pawm a ni ta lo a ni.
Oman hi FIFA ranking-ah India aiin step 40 laiin an sang zawk a, nimina Oman an hmachhawnnaah hian India coach Stephen Constantine chuan player 4 zet an vawi khatna atan ram tan a khelhtir a, Oman hian inkhel an thunun hle a, an hmatawng te finishing ṭha deuh se chu hei ai hian India hian goal an phur tam thei zawk ngei ang. India hian June ni 16-ah Guam an hmachhawn leh ang.