Police-ten Tomar chu Faizabad-ah an hruai

Delhi Police te chuan AAP hruaitu leh Delhi Law Minister aṭanga bâng ta, Jitender Singh Tomar-a degree lem neia puhna chu an chhuizui zel a, nimin khan Tomar hi Uttar Pradesh-a Faizabad-ah hemi chungchanga finfiahna ṭhenkhat lakkhawmnaah Police te hian an hruai a ni.
Tomar hian RML Avadh University, Faizdabad aṭangin BSc a zo niin a sawi a, Police te chuan he University-ah hian spot-verification nei tur leh zawhna zâwt turin an hruai ta a ni. Hetiang bawk hian LLB degree a neihnaa a sawi Law College, VNSL Studies (ffiliated to Tilak Manjhi Bhagalpur University of Bihar)-ah an hruai leh dawn bawk a ni.

Police te chuan Tomar-a’n degree lem a nei nia puhna chungchangah hian thil diklo inphum ru a awm leh awm loh uluk taka an chhuichian tur thu sawiin, heng document te hi tu pek nge tih te, document lem a nih chuan tunge a siamsaktu tih thlenga an chhui zui tur thu an sawii a ni.

Kum 46 mi, Tomar hian nizan hmasa khan Lock-up aṭangin a lawyer kaltlangin Chief Minister hnenah bânna a thehlut a, hei hi pawmsak a ni a, Court-in a phalsak angin Delhi Police te hian ni 4 an la kawl dawn a ni.

Hetihlai hian Tomar hmun ruak, Law Minister dinhmun luah tur hian nimin khan Delhi Jal Board vice-chairman Kapil Mishra chu ruatfel a ni a, kum 34 mi, Mishra hi vawi khat MLA a nihna a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram