Chief Minister hlui Pu Zoramthanga chuan Mizo hnahthlak rammu mek pawl 8 te inchhunkhawmna United People’s Front (UPF) leh sorkar laipui inbiakna chu official level atangin political level-ah hlankai a ni a ti.
Thawhlehni-a Janpath Hotel, New Delhi-a India sorkar leh UPF aiawhte’n inkahhai (suspension of operations) thuthlung an ziah rual khan sorkar laipui hian inbiakna hi political level-ah a hlangkai niin Pu Zoramthanga chuan kan Corr a hrilh a. Amah chu inbiakna tak takah tel ve lovin hun rei tak ralthuam leh tharum hmanga lo inbei tawh thinte an inrin tawn theihna tur atana palai hna thawk mai a nih thu a sawi a. Rei tak inbiakna chhunzawm tawh loh chhunzawm leh a nih theihna atan Ministry of Home Affairs hotute chu a hmuh sak niin a sawi a ni.
Pu Zoramthanga chuan kum rei tak inbiakna nei mumal lovin an lokal tawh tih sawiin thla kaw chhung phei chu inkahhai pawh awm lovin an kal a. Hei hian boruak chhia a thlen theih avangin inrawlh tura an ngenna angin palai hna a thawk niin a sawi a. Sorkar emaw hel pawl ruat palai interlocuter tih emaw a vuah a duhloh thu leh tharum hmanga inep thinte’n inbiakna dawhkan an kil theihna atana hmanrua-ah a tang mai niin a sawi a ni.
UPF a telte hi Kuki, Paite leh Hmar pawl hrang hrangte an ni a. Kuki National Front (KNF), Zomi Revolutionary Army (ZRO), Kuki Revolutionary Army (United), Zomi Defence Force (ZDF), United Kuki Liberation Front (UKLF), Kuki Revolutionary Front (KRF), Zomi Defence Volunteers (ZDV) leh Hmar People’s Convention (Democrats) te an ni a. HPC (D) te hi H. Zosangbera pawlte niin he inbiaknaah hian an pawl Defence Secretary invuah Sanga Hmar chuan an pawl ai a awh a ni.
Inkahhai thuthlung an ziahnaah hian UPF Chairman S.T. Thangboi bakah pawl hrang hrang aiawhte an tel a. Sorkar laipui aiawhin Ministry of Home Affairs a hmar chhak bial changtu Joint Secretary Shambu Singh leh official dangte an tel bawk a ni.