Sawrkar laipuiin hmar-chhak state 8 leh state dang 4 te chu a bik taka enkawlna (Special Category State) an nihna tihtawp sak tumna a neih mek avangin, Mizo National Front President, Pu Zoramthanga chuan June ni 20 khan Prime Minister, Narendra Modi hnenah lehkha a thawn.
MNF thuchhuah tarlan danin MNF President lehkha thawn hi Union Home Minister, Rajnath Singh leh Finance Minister Arun Jaitley bakah Special Category State Chief Minister te pawh a copy a pe bawk a ni.
MNF thuchhuah chuan CM hlui, Pu Zoramthanga’n Prime Minister hnena a lehkha thawnah hian sawrkar laipuiin Special Category State tihtawp chungchang a ngaihtuah mek tih a hriat thu a sawi a. Indian Union-a State dang zawngte aiin a bika dawmkân ngai, heng Special Category State te economy dinhmun chu a hnufual bik em em a ni, a ti a. Economy-a an hnufualna chuan sum leh pai bakah ram inbelbawlna ah te, politics ah te harsatna tam tak siamin buaina nasa tak chhuak thut thei anih bakah, Helna te a lo chhuah/awm thin na chhan pawh heng vang hi a ni thin, a ti a. Chung thilte chu abik takin Noth East states ah a nih thu a sawi. Chuvangin, Special Category State tih tawp mai hi heng economy lama la hnufual state/ram ah hian tihtawp mai chu hunlo a tih thu, Pu Zoramthanga chuan a tarlang bawk.
MNF President chuan Central sawrkar leh MNF-in inremna ‘Mizoram Peace Accord of 1986’ a ziahah Mizoram chu Special Category State a nih angin sum leh paiah Central puihna (central finance assistance) pek tur a ni tih, Para 6 (a) ah chiang taka a chuan thu a tarlang tih MNF thu-chhuah chuan a tarlang bawk.