Sakhaw thila Mizoram atanga Myanmar rama lût te Myanmar sawrkarin Mizoramah hlân lêt

Sakhuana thil avanga Mizoram chhuahsana Myan-mar ram lût Champhai Tlangsam Venga chhungkaw 4 aṭanga chhuak mi 19 zinga 18-te chu Myanmar sawrkarin Mizoram-ah rawn hlan let lehin nimin zing khan heng mite hi Indo-Myanmar Border Trade Point Zokhawtharah Champhai DC Pu H.Lalengmawia’n a lo dawng sawng.
DC Pu H.Lalengmawia chuan Myanmar sawrkar kut aṭanga mi 18 te lo kir leh theihna tura Myanmar ram chhunga awm Mizo-te hmalak-na chu fakawm a tih thu tarlang-in, ramri kar danah cheng mahila kan pianken ziarang tlawmngaihna hian min phuar khawm tlat avangin hun harsa leh buaina karah pawh unau kan nihna hi a lo lang chhuak ṭhin a ni, a ti a. Hun lo kal zel turah ṭanpui leh ṭawiawm ngaia kan awm chuan inpui tlang zel turin Zo hnahthlakte a sawm nghal bawk.

Myanmar sawrkarin a rawn thawnlêt heng chhung-kaw 4 aṭanga mi 19 Mizoram chhuahsana Myanmar ram lut zinga upa ber Pu Zonghing-lova chu Tamu hmuna an awm lai hian kawchhung thisen pût vangin a boral a, an zingah hian naupang 4 an tel a ni. Kumin March ni 15 khan Tlangsam aṭangin ke in (Khawzim kaiah) Myanmar ramlutin, March ni 24 khan (Indo-Myanmar Border Trade Point Moreh bul Tamu (Myanmar) kiangah Myanmar sawrkar-in a man a. Tamu-a Mizo |halai Pawl leh Pu D.Thangliana (L) (Tamu Bialtu MLA Myanmar) ten an hriat veleh theihtawp an chhuah a, Mizorama an kir leh theihna turin hma an la zui nghal a.

Niminpiah chawhnu khan Tamu Mizo |halai Pawl President Pu Lalchatuana leh Secretary Pu Lalrosanga ten heng mite hi Tamu aṭangin Tahan thleng an hruai a. Tahan Mizo |halai Pawl (TMTP) Central President Pu Lalrosanga,  General Secretary Pu Zohma-ngaiha, Exe. Comtt. member Pu Vanlalneia leh Exe. Comtt. member Pu K. Lallawmzuala ten nizan hmasa khan Tahan aṭanga ramri (|iau) thleng an rawn hruai a ni.

Heng mite lo dawn-sawnna hun Land Custom Station-a neih hi Sub-Hqrs. YMA Champhai President Pu VL Chama’n kaihruaiin, Tamu leh Tahan M|P te ṭanpuina Sub-Hqrs. YMA Champhai leh Champhai DC ten an hlan a. Tahan M|P hruaitute aṭangin heng miten Mizoram a an kir leh theihna tura hmalak dan tlangpui ngaihthlak a ni bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram